थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

भल्मन्साके जिम्मेवारीमे आघे बह्रटी महिला

पहुरा | ५ माघ २०७९, बिहीबार
भल्मन्साके जिम्मेवारीमे आघे बह्रटी महिला

पहुरा समाचारदाता
धनगढी, ५ माघ ।
थारु समुदायके प्रत्येक गाउँमे अब्बे लौव भल्मन्सा छन्ना काम जारी बा ।

माघ महिनाभर यी प्रक्रिया जारी रही । पहिले पहिले पुरुष मनै गाउँक भल्मन्सा खेलाइट कलेसे आब भल्मन्सामे जिम्मेवारी महिलाफे लेहे लागल बटै । विफेक रोज धनगढी उपमहानगरपालिका वडा नम्बर ११ बाँसखेडामे हुइल भुरा खेलसे भल्मन्साके जिम्मेवारी यी बरसके भल्मन्साके जिम्मेवारी महिलाहे डेहल बा । गैल बरस बाँसखेडा गाउँक भल्मन्सामे गीता चौधरीहे चुनगिल रहे, कलेसे असौक सालमे हुकहिनहे जिम्मेवारी डेहल धनगढी उपमहानगरपालिका नगर भल्मन्सा समितिके अध्यक्ष रोहित चौधरी बटैलै । ओस्टेक करके चौकीदारके जिम्मेवारी इन्दिरा चौधरीहे डेहल बा ।

महिलाहुक्रेफे समाज परिवर्तन करे सेक्ठै कहिके डेखाइक लाग भल्मन्सा ओ चौकीदारमे महिलाहे छनौट करल उहाँ बटैलै । लौव कार्यसमितिके यी बरसके पहिल निर्णय÷योजना डेउथान निर्माण कैना कहल बा ।

ओस्टेक करके माघी डेवानी÷भुर्रा खेलसे कैलाली जिल्लाके घोडाघोडी नगरपालिका वडा नम्बर १० लठैया गाउँमेफे भल्मन्सामे सुनितादेवी चौधरी सर्वसम्मतसे चयन कैगिल बा । उहाँहे गाउँ भरिक किसान सर्वसम्मतसे भल्मन्सा बनाइल श्रवण चौधरी बटैलै ।
उहाँ कहलै, ‘हमार गाउँमे दुई बरसके लाग भल्मन्सामे छनौट कैजाइठ, आघेक भल्मन्साके दुई बरसे कार्यकाल पुुगलपाछे भुरा खेलसे लौवा भल्मन्साके रुपमे सुनितादेवी चौधरीहे सर्वसम्मतसे छनौट करली ।’


यिहीसे आघेफे इन्दादेवी चौधरी लठैया गाउँक भल्मन्सा बन्के गाउँक नेतृत्व सम्हार रहिट । दुई बरसे कार्यकाल पुगलपाछे इन्द्रादेवी लौवा भल्मन्सा सुनिताहे जिम्मेवारी सौप्ले बटी ।

जनाअवजको टिप्पणीहरू