हमार सहकारी बेनौलीके वार्षिक साधारण तथा भवन शिलान्यास

पहुरा समाचारदाता
धनगढी, २३ माघ । कैलालीके कैलारी गाउँपालिका ६ बेनौलीस्थित हमार बहुउदेश्यीय सहकारी संस्था लिमिटेडके पहिल वार्षिक साधारण सभा तथा भवन शिलान्यास हुइल बा ।

सहकारीके अध्यक्ष लखन चौधरीके सभापतित्वमे हुइल कार्यक्रमके बरका पहुना सुदूरपश्चिम प्रदेश सभा सदस्य रमेश धामी रहल रहिट ।

कार्यक्रमहे सम्बोधन करटी प्रदेश सभा सदस्य धामी आपन कार्यकालमे आपन निर्वाचन क्षेत्रमे सेकटसम काम कर्ना बटैले बाटै । विकास निर्माणमा सुशासन कायम कर्ना बटैटी उहाँ अप्ने फेन भ्रष्टाचार नैकर्ना ओ औरे जहनफेन करे नैडेना बटैलै ।

कार्यक्रमके खास पहुना प्रधानमन्त्री कृषि आधुनिकीकरण परियोजना कैलालीके प्रमुख गोविन्दराज जोशी, कैलारीके ६ नं. वडाध्यक्ष प्रेमबहादुर चौधरी, कृषि ज्ञान केन्द्र कैलालीके अधिकृत भूमि उपाध्याय सहकारीके माध्यमसे कृषिमे उत्पादकत्व, बजारीकरण, रोजगारी सिर्जना करे सेक्नामे जोड डेलै । उहाँहुक्रे काम कर्ना सहकारीहे सरकारी निकायसे सहयोग हुइना फेन आश्वास्त पर्लै ।

कार्यक्रममे गोहु सुपर जोन कैलालीके अध्यक्ष अजित चौधरी, परिश्रम कृषि सहकारीके व्यवस्थापक रामसमझ चौधरी, जनवातावरण बहुउदेश्यीय सहकारीके अध्यक्ष गीता चौधरी, बेनौलीके स्थानीय पहलमान चौधरीलगायत शुझकामना मन्तव्य व्यक्त करल रहिट ।

कार्यत्रममे सहकारीके सचिव पल्टुराम चौधरी संगठनिक तथा प्रगति प्रतिवेदन प्रस्तुत करल रहिट करले सहकारीके सहव्यवस्थापक प्रेम कुमारी चौधरी आर्थिक प्रगति प्रतिवेदन प्रस्तुत करल रहिट ।

प्रस्तुत प्रतिवेदन अनुसार ६६ जाने शेयर सदस्य रहल सहकारी एक वर्षके अवधिमे १५ लाख रुपैयाँके कारोबार कर्ले बा ।

यहेबीच सहकारीके चार कोठे भवनके शिलान्यास करगिल बा । भवनके निर्माण सुदूरपश्चिम सरकारके भूमि व्यवस्था कृषि तथा सहकारी मन्त्रालय अन्तरगत कृषि ज्ञान केन्द्रमार्फत हुइटी रहल सहकारीके अध्यक्ष लखन चौधरी बटैलै । १५ लाख कृषि ज्ञान केन्द्र कैलाली ओ ३ लाख सहकारीके करके जम्मा १८ लाख रुपैयाँमे भवन निर्माण हुइटी रहल हो ।