कृषि क्षेत्रके विकासमे प्रतिवद्ध बटीः अध्यक्ष राजसमझ

पहुरा समाचारदाता
हसुलिया, २३ माघ । कैलालीके कैलारी गाउँपालिकाके अध्यक्ष राजसमझ चौधरी कृषि क्षेत्रके विकासके लाग गाउँपालिका निरन्तरण आघे बह्रटी रहल बटैलै ।

सोम्मारके रोज कैलारी गाउँपालिकाके आयोजनामे हसुलियामे कैगिल कैलारी गाउँपालिकाके भल्मन्सा, बडघरहुकनसंग विविध विषय उप्परके छलफल तथा अन्तरक्रिया कार्यक्रममे बोल्टी गाउँपालिका अध्यक्ष किसानहुकनहे मल सहजे उपलब्धके वातावरण मिलाइल, कृषि मिटरके व्यवस्था करटी रहल बटैलै ।

उहाँ कहलै, कैलारी गाउँपालिका डुबान, पटान, कटान क्षेत्र हो । यहाँके उब्जनी हुइना जमिन प्रत्येक बरस घुरहा, कटैनी, मोहना लडियासे कटान करटी बा । उब्जनी हुइल अन्नवालीफे पुहालैजैटी बा । किसानहुकनके समस्याहे मध्यनजर करके गाउँपालिकासे मालपोतमे आधा छुट करले बा । बर्खाके समयमे बाली नाली डुबान हुइना ओरसे अनुदानमे चैते धान ओ बसन्ते मकै लगैना सुरुवाट करे लागल गाउँपालिका अध्यक्ष राजसमझ जनैलै ।

गाउँपालिका अध्यक्ष कहलै, भौतिक विकास संगे हम्रे अब्बे शिक्षा ओ स्वास्थ्य क्षेत्रमे ढेर ध्यान डेना जरुरी बा । हमार लर्का विगराटै, काल्हके कर्णाधार कहलेक आजके लर्का, यूवा हुइटै, ओइनहे मजा डगर डेखाई नइसेक्लेसे हमार धन सम्पति कमैलक कुछ अर्थ नइरही । भौतिक विकाससेफे शैक्षिक ओ स्वास्थ्यके विकास कैना जरुरी रहल उहाँ बटैलै ।

गाउँपालिकासे स्वास्थ्य क्षेत्रमे ध्यान डेटी १५ शैयाके अस्पतालके निर्माण करटी रहल बा । काम तिब्र गतिमे बह्रल अध्यक्ष राजसमझ बटैलै । गाउँपालिकासे निशुल्क रगतके व्यवस्था, सुत्केरी महिला धनगढी बच्चा जन्माई जैना अवस्था हुइलेसे निशुल्क एम्बुलेन्सके व्यवस्था मिलाइलफे उहाँ बटैलै ।

कैलारी गाउँपालिकाके नौ वडा अन्र्तगत सक्कु गाउँक भल्मन्साहुकनके उपस्थितिमे हुइल कार्यक्रममे एक वडासे दुई जाने भल्मन्सा अपन गाउँठाउँके समस्या ओ विकासके अवगत करैले रहिट । भल्मन्साहुक्रे कृषि क्षेत्रके विकास लाग कृषि मिटरके व्यवस्था कैडेना, डगर घाट, पुल पुलेसा निर्माणके लाग गाउँपालिकासे ध्यान डैडेनाफे माग करल रहिट ।

भल्मन्साहुकनसे धारल समस्याके सम्बोधन करटी गाउँपालिका अध्यक्ष प्राथमिकताके आधारमे पुरा कैटी लैजैना बटैलै । उहाँ कहलै, गाउँठाउके विकास करेक लाग जनप्रतिनिधि ओ भल्मन्साहुकनके सहकार्य जरुरी बा । यैसिन छलफलहे निरन्तरता डेटी समस्याके समाधानफे करटी जैना उहाँ प्रतिवद्धता जनैलै । छलफल कार्यक्रममे कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर ३ के वडा अध्यक्ष सन्तराम चौधरी, वडा सदस्यहुकनकेफे सहभागिता रहे ।