‘पुर्खनके सिखाइल संस्कृति पुस्तान्तरण आवश्यक’
पहुरा समाचारदाता
हसुलिया, २ चैत । कैलाली जिल्ला कैलारी गाउँपालिका वडा नम्बर ९ गदरिया गाउँमे रानाथारु समुदायके होरी मिलन कार्यक्रम निम्जल बा ।
रानाथारु समाज कैलारी गाउँपालिका–९ गदरियाके आयोजना तथा कैलारी गाउँपालिकाके आर्थिक सहयोगमे होरी मिलन कार्यक्रम हुइल हो । कार्यक्रमके सहभागीहुक्रे पहिचान बोकल कला, संस्कृति परम्परा, भेषभुसा जोगाइक लाग लौवा पुस्तामे पुस्तान्तरण आवश्यक रहल बटैले बटै ।
होरी मिलन कार्यक्रममे नेपाल रानाथारु समाजके पूर्व केन्द्रीय अध्यक्ष तथा नेपाली काँग्रेसके केन्द्रीय सदस्य जीवन राना रहल रहिट । कार्यक्रममे बोल्टी उहाँ कहली, ‘पौराणिक ज्ञान, सीप रहल हमार पुर्खा ओरैटी जाइटै । समयमे पुर्खनके सीप लौव पुस्तामे सारे नइसेक्लेसे लोप हुजाई ।
हमार पुरान गरगहना करिब लोप हुगिल,‘ पूर्व केन्द्रीय अध्यक्ष राना कहली, ‘उहीहे बचाइ परठ कहिके हम्रे समयमे विचार पुगाई नइसेक्ली । अपन गरगहना सस्तामे बाजीनसे बेच्ली । अब्बे उहे गहनाहे फेरसे आवश्यक परटा,लौवा किनेबेर बहुट मंहगा परटा ।’ रानाथारु समुदायके लेंहगा बनाईबेर ढेर खर्चके साथे करिब ६ महिना लग्ना करल उहाँ बटैली ।
कार्यक्रमके विशिष्ट पहुना कैलारी गाउँपालिकाके अध्यक्ष राजसमझ चौधरी पुरान संस्कृति बचैना यूवा पूस्ताके काँधमे आइल उहाँ बटै । रानाथारु समुदायके संस्कृति भुटभुटाइल अवस्था बा,’ उहाँ कहलै, ‘कैलारी गाउँपालिकामे अक्के गदरियामे केल रानाथारु बटी । यी पालिकाके अल्पसंख्यक समुदायमे बटी । संस्कृति बचाइक सक्कु जाने एकजुट हुइना आवश्यक बा ।’ पहिलेक पुर्खनथेन बहुट सीप रहिन, अब्बे ओइने ओराइटे संगे सीपफे अपनसंग लैजाइटे उहाँ कहलै । उहीहे जोगाइक लाग अब्बेसे हमार भाषा, कला, संस्कृति भेषभुस लर्कनहे सिखैना जरुरी रहल बटैलै ।
ओस्टेक विशिष्ट पहुना कैलारी गाउँपालिकाके उपाध्यक्ष भगवतीकुमारी चौधरी हमार भाषा, कला संस्कृति रितिरिवाज, चालचलन, खानपीन फरक मेरके रहल ओरसे उहीहे बचैना जरुरी रहल बटैटी । उहाँफे कला, संस्कृति लर्कनमे सारे नइसेक्लेसे ओइने भाषा, कला, संस्कृति विस्राजैना बटैली ।
यूवा पुस्ता होरीमे नच्ना ढोल बजाई नइ जन्ना, पुरान गीतबाँसमे नाँच नाँचे नइजन्ना अवस्था बा, गाउँपालिका उपाध्यक्ष कहली,‘अब्बे ओइनहे नइसिखैबी कलेसे काल्हके दिनमे ओइने खानपान, चाडपर्व, रितिरिवा सब विस्रा जैही । कैलारी–९ मे केल रानाथारु समुदायके बसोबास रहल बा, मने धनगढी उपमहानगरपालिका टमान वडामे रानाथारुके बसोबास रहल ओरसे दुनु पालिका मिल्के ओइनेके पुरान कला, संस्कृति जोगाइक लाग सामुहिक कार्यक्रम कैना तयार रहल उहाँ बटैली ।
कार्यक्रममे कैलारी गाउँपालिका–४ के वडा अध्यक्ष ठागुराम चौधरी, वडा नम्बर ६ के वडा अध्यक्ष प्रेमबहादुर चौधरी, धनगढी उपमहानगरपालिका–१९ के वडा अध्यक्ष बाँधुराम चौधरी, कैलारी–४ के वडा सदस्य हरिद्वारी चौधरी, गदरिया गाउँके पूर्व भल्मन्सा ठग्गीराम रानालगायत मन्तव्य व्यक्त करल रहिट ।
कार्यक्रम कैलारी गाउँपालिका–९ गदरिया गाउँक पढना धनबहादुर रानाके अध्यक्षतामे हुइल रहे । कलेसे संचालन लक्ष्मी राना ओ स्वागत मन्तव्य रामचन्द्र राना करल रहिट । कार्यक्रममे कैलारी गाउँपालिका वडा नम्बर ३ वडा सदस्य शकुन्तला चौधरी, वडा नम्बर ९ के वडा सदस्य जगमा चौधरी, वडा नम्बर ५ के वडा सदस्य अनारकली चौधरी, पार्वती परियार ओ वडा नम्बर ९ वडा सचिव ठागुराम चौधरी, गाउँपालिका उपाध्यक्षके स्वकीय सचिव रामकृष्ण चौधरी, गाउँक भल्मन्सा, बृद्धिजीवि लगायतके सहभागिता रहे । होरी मिलन कार्यक्रममे टमान मेरिक होरी नाँच प्रस्तुत कैगिल बा ।
