बनुवासंगे बन्यजन्तु जोगाइ परठः गाउँपालिका अध्यक्ष
पहुरा समाचारदाता
हसुलिया, २ चैत । बसन्ता वन क्षेत्र सामुदायिक वन उपभोक्ता समुह समन्वय समितिके १४औं बार्षिक साधारणसभा विफेक रोज निम्जल बा ।
कैलारी गाउँपालिकाके अध्यक्ष राजसमझ चौधरीके वडका पहुनामे हुइल कार्यक्रममे उहाँ बनुवा संरक्षणसंगे बन्यजन्तुनहेफे जोगाइ पर्ना बटैलै । बनुवा मानव जीवनसंग जोरल कहटी उहे बचाई आवश्यक बा,’ उहाँ कहलै, ‘बनुना हुइना जडीबुटी, काठी पाटासे आम्दानीके स्रोत बह्राई सेक्जाई । बनुवाहे मस्लेसे मौसम परिवर्तनहुके मानव स्वास्थ्यमे असर परे सेकठ ।’
बनुना घुमे गैलेसे चिरैनके बोली, जंगली जानबार बनुवा मनमोहक हुइना उहाँ बटैलै । ओस्टेक करके थारु समुदायमे सिकलसेल रोग ढेर डेखा परल कहटी परिक्षण कैना आवश्यक रहल उहाँ कहलै ।
कार्यक्रममे विशिष्ट पहुना बसन्ता डिभिजन कार्यालयके प्रमुख श्याम सुन्दर माझी, इलाका प्रहरी कार्यालयके प्रमुख जयसिंह भण्डारी, कैलारी गाउँपालिका–४ के वडा अध्यक्ष ठागुराम चौधरी, बसन्ता वन क्षेत्र सामुदायिक वन उपभोक्ता समुह समन्वय समितिके सल्लाहकार संयोजक भरतराम चौधरी, मिलन सामुदायिक वनके सचिव सुनिता चौधरी लगायत मन्तव्य व्यक्त करल रहिट । कार्यक्रममे जीवन समुदायिक वनके गणेश चौधरी, बन हेरालु केसरे कामी, शिवहरि चौधरी, भुलुराम चौधरी, सन्दिप चौधरीलायतहे सम्मान कैगिल बा ।
बसन्ता वन क्षेत्र सामुदायिक वन उपभोक्ता समुह समन्वय समितिके अध्यक्ष रमेश चौधरीके अध्यक्षतामे हुइल कार्यक्रममे सन्दिप चौधरी प्रगति प्रतिवेदन प्रस्तुत करल रहिट । कार्यक्रमके संचालन समितिके सचिव दिलमाया चौधरी ओ स्वागत मन्तव्य सदस्य सिता चौधरी करल रहिट ।
