चार बर्षमे १० हजारसे ढेर महिलासे गर्भपतन सेवा

पहुरा समाचारदाता
धनगढी, ७ चैत । कैलाली जिल्लामे पछिल्का चार बर्षके अवधिमे १० हजारसे ढेर महिला गर्भपतन सेवा लेले बटै ।

जनचेतना तथा युवा जागरण मञ्च नेपाल ओ आईपास नेपालके आयोजनामे धनगढीमे यौन तथा प्रजनन स्वास्थ्य ओ सुरक्षित गर्भपतन सम्बन्धी सञ्चारकर्मीसंग छलफल कार्यक्रममे स्वास्थ्य कार्यालय कैलालीके रमा गिरी प्रस्तुतिकरण करटी जिल्लामे आर्थिक वर्ष ०७६÷७७ से आर्थिक वर्ष २०७८÷०७९ समके अवधिमे औषधी खाके ओ शल्यक्रियामार्फत १० हजार एक सय ४७ महिलासे गर्भपतन कराइल बटैले बटी ।

कैलाली जिल्लामे ५५ ठो संस्था सुरक्षित गर्भपतनके लाग मान्यता पाइलमे ४३ ठाउँमे यी सेवा सुचारु हुइल उहाँ बटैली ।
स्वास्थ्य कार्यालयके अनुसार आर्थिक वर्ष २०७८÷०७९ मे पाँच हजार पाँच सय ६७ महिला गर्भपतन कराइलमे २० वर्ष तरेक किशोरीके संख्या तीन सय ६५ रहल बा ।

आर्थिक वर्ष २०७७÷०७८ मे दुई हजार छ सय २९ गर्भवती महिला गर्भपतन कराइलमे दुई सय १७ जाने २० वर्ष टरेक किशोरी रहल बटै । ओस्टेक आर्थिक वर्ष २०७६÷०७७ मे एक हजार नौ सय ५१ जाने गर्भवती महिलासे गर्भपतन कराइलमे २० वर्षटरेक किशोरीके संख्या एक सय ८७ जाने रहल बटै ।

गर्भपतन करुइया महिला मन्से २० वर्ष उमेरटरेक किशोरीके संख्या उल्लेख्य रहल जिल्ला स्वास्थ्य कार्यालयके तथ्यांकमे उल्लेख बा । कार्यालयके तथ्यांकअनुसार यी अवधिमे गर्भपतन कराइल मन्से २० वर्षटरेक किशोरीके संख्या सात सय ७९ रहल बा ।

कार्यक्रममे सहजीकरण करटी आइपास नेपालके नीति तथा सुशासन विशेषज्ञ माधवी बज्रचार्य १० हप्ताके अनिइच्छित गर्भके गर्भपतन औषधी मार्फत ओ उ मिति नाघल २८ हप्तासमके गर्भहे औजारसे गर्भपतन कराई सेक्ना बटैली । सरकारसे स्वीकृति लेके सुरक्षित गर्भपतन करैना संस्थासे औषधि खवाके ओ शल्यक्रियामार्फत गर्भपतन करैना करल बटै ।

गर्भपतनसे कानुनी मान्यता पैना आघे नेपालमे असुरक्षित तथा लुकिछिपी अनिच्छित गर्भपतन हुइना करल रहे । असुरक्षित गर्भपतनके कारण ढेर गर्भवती महिला जोखिम बेहोरे परल उहाँ बटैली ।

ओस्टेक करके फाया नेपालके कार्यक्रम निर्देशक शेरबहादुर बस्नेत संचारकर्मीनहुकनहे यौन तथा प्रजनन स्वास्थ्य ओ सुरक्षित गर्भपतन सम्बन्धी जानकारी डेहल रहिट ।