मुख्यमन्त्री शाहके सय दिन पुरा
पहुरा समाचारदाता
धनगढी, ५ जेठ । सुदूरपश्चिम प्रदेश सरकार गठन हुइल सय दिन पुगल बा । गत माघ २७ गते शपथ लेहल मुख्यमन्त्री कमलबहादुर शाहके शुकके पदभार ग्रहण करल सय दिन पुगल हो ।
शुकके मुख्यमन्त्री तथा मन्त्रिपरिषद्के कार्यालयमे पत्रकार सम्मेलन कैटी मुख्यमन्त्री शाह सरकारके सय दिनके उपलब्धि सार्वजनिक करले बाटै । मुख्यमन्त्री राजनीतिक सहमति ओ स्थायित्वके नेतृत्व कैटी वर्तमान सरकारसे काम करटी रहल ओहकान दाबी रहल बा ।
भौतिक पूर्वाधार विकासमे बढोत्तरी, वार्षिक विकास कार्यक्रम पहिचान छनौट ओ प्राथमिकीकरणमे अनुशासित ओ जवाफदेही प्रणाली स्थापनाके सुरुवात ओ वार्षिक बजेट तर्जुमामे स्थानीय तहसँगके उच्चतम समन्वय ओ सहकार्य संस्कृतिके विजारोपण हुइल उल्लेख करल बा । सरकारसे धार्मिक ओ प्राकृतिक पर्यटन प्रवर्द्धन ओ पर्यटन पूर्वाधार निर्माण, विपद् जोखिम न्यूनीकरणमे सहकार्य ओ शिक्षा स्वास्थ्य क्षेत्रके समग्र सुधारके पहल सुरु करल मुख्यमन्त्री शाह बटैलै ।
सरकारसे पूर्वाधारओर २२ किलोमिटर पक्की ओ ७५ किलोमीटर ग्राभेल सडक निर्माण हुइल ओ खानेपानीके ३३ आयोजनासे ४ हजार ५३८ जाने लभान्वित हुइल जनाइल बा । उ अवधिमे ३ सडक पुल ओ १ झोलुङ्गेपुलके काम सम्पन्न हुइल जनाइल बा ।
प्रदेश सरकारसे थप १ हजार २२६ हेक्टरमे सिँचाइ सुविधा पुगल, १५० लाख किलोग्राम खोटो ओ ५ लाख किलोग्राम जडिबुटी संकलन, प्रदेशभर ४५ हजार बिरुवा लगाइल जनाइल बा ।
एक सय दिनके अवधिमे प्रदेश सरकारसे सदाचार नीति ओ भ्रष्टाचार नियन्त्रण कार्ययोजना तर्जुमा करल बा । मागमे आधारित अनुशासित बजेट तर्जुमा प्रक्रियाके सुरुवात हुइल, संघ ओ स्थानीय तहसँग समन्वय एवं विकास साझेदारसँग परामर्श कैनाके साथे ३ लाख ५० हजार पशुपन्छीहे खोप, आलु, किबी ओ चैते धान खेती विस्तार हुइल सरकारसे आपन सय दिनके उपलब्धि मन्ले बा ।
मुख्यमन्त्री शाह प्रदेशके वस्तुस्थिति अध्ययन, टमान विकास आयोजना ओ जिल्लाके स्थलगत अवलोकन ओ अनुगमन कैके समस्या पहिचान ओ भावी कार्यदिशा निर्धारण कैना काम हुइल जनाइल बा । सरकारसे प्रदेशके धार्मिक, सांस्कृतिक तथा आध्यात्मिक पक्षके उजागर कैना मानसखण्ड सम्मेलन सम्पन्न करल, खप्तड, रामारोशन पर्यटकीय क्षेत्रके प्रवर्द्धनके लाग विशेष पहल हुइनाहे सरकारके उपलब्धि ठन्ले बा ।
ओस्टके, प्रथम खप्तड अन्तर्राष्ट्रिय आध्यात्मिक सम्मेलनके तयारी पूरा हइनाहे फेन सरकारसे उपलब्धि मन्ले बा । सय दिनके अवधिमे सरकारसे मुख्य रुपमे प्रणाली सुधारमे केन्द्रित रहीके काम करल जनैले बा । सरकारसे लम्मा समयसे निर्माण कार्यमे कौनो प्रगति नैहुइल विकास आयोजनाके स्थलगत अनुगमन कैके सम्बन्धित निर्माण व्यवसायी ओ कर्मचारीहे आयोजनाके शीघ्र कार्यान्वयन कैना निर्देशन डेहल बा ।
प्रदेश सरकारसे अनुशासन नीतिगत ओ प्रणालीगत सुधारके अतिरिक्त विकास निर्माणहे तीव्रता डेहल जनैले बा । सरकारसे पहिल चौमासिकमे रहल १४ प्रतिशतके न्यून प्रगति दरहे बह्राके ३३ प्रतिशतमे पुगैले बा । मुख्यमन्त्री शाह प्रदेशमे रहल राष्ट्रिय गौरव ओ प्रादेशिक गौरवके आयोजना कार्यान्वयनमे तीव्रता डेना समन्वय करल दाबी रहल बा । साथे संघीय सरकार तथा कुटनीतिक एवं विकास साझेदार निकायसँग समन्वय ओ परामर्श करल जनाइल बा ।
