पत्रकार शेरबहादुर सम्मानित
पहुरा समाचारदाता
धनगढी, ७ जेठ । कैलालीके पत्रकार शेरबहादुर ऐर सम्मानित हुइल बटै । भण्डाफोर पत्रकारिता पुरस्कार २०८० से पत्रकार ऐर सम्मानित हुइल हुइट ।
भण्डाफोर शिल्पी प्रकाशन प्रालीसे सञ्चालित भण्डाफोर डटकमके पहिल वार्षिकोत्सवके अवसरमे उहाँहे पुरस्कार स्वरूप नगद १५ हजारसहित प्रमाणपत्र ओ दोसल्ला ओढाके सम्मानित करल बा । पत्रकार ऐरसे विगत १० वर्षसे धनगढीमे रहिके टमान सञ्चार माध्यममे काम करसेकल बटै । हाल उहाँ धनगढी खबरके सम्पादक रूपमे काम करटी रहल बटै । उहाँ राजनीति, स्वास्थ्य तथा वातावरण तथा सामाजिक क्षेत्रमे कलम चलैटी आइल बटै ।
ओस्टे भण्डाफोर पत्रकारिता पुरस्कार प्राप्त करल ऐरहे पत्रकार महासंघ कैलालीके अध्यक्ष हिमालय जोशी बधाई डेले बटै । उहाँ कार्यक्रममे बोल्टी अब्बेक अवस्था यैसिन कार्यक्रमसे पत्रकारहे अभिन काम कैना हौसला प्रदान करल बटैले ।
पत्रकार महासंघ सुदूरपश्चिम प्रदेशके अध्यक्ष योगेश रावल पत्रकारिता पेसासे पलायन हुइना अवस्थामे भण्डाफोर डटकमसे करल कार्यक्रमसे पत्रकारहे थप हौसला मिलल बटैलै । कोरोनासे पत्रकारसे यी पेसासे पलायन हुइना अवस्थामे यी मेरिक कामसे हौसला प्रदान करल बटैलै ।
भण्डाफोर डटकमके सम्पादक हिमेश विकसे पत्रकार ऐरके अपन लगन ओ मेहनतके कारण वर्ष पुरस्कार पैना सफल हुइल बटैलै । उहाँ अपने करल यी मेरिक सम्मानसे औरजे फे सिक्न बटैलै । उहाँ भण्डाफोर कहल समाजमे रहल विकृति ओ विसंति विरुद्ध आवाज उठैना माध्यम रहल बटैलै । उहाँ अइना दिनमेफे अस्टे काम करटी आघे बह्रना बटैलै ।
कार्यक्रममे टमान सञ्चार माध्यममे कार्यरत पत्रकार तथा प्रहरी निरीक्षकके सहभागिता रहल रहे । कार्यक्रमके सञ्चालन तेज बोहरा करले रहिट ।
–
–
