आम सञ्चार नीति नन्बीः मन्त्री सिंह
पहुरा समाचारदाता
धनगढी, ११ जेठ । सुदूरपश्चिम प्रदेश सरकारके आन्तरिक मामिला तथा कानूनमन्त्री पृथ्वीबहादुर सिंह समग्र पत्रकारिता विकासके लाग आम सञ्चार नीति नन्ना प्रतिवद्धता जनैले बटै ।
नेपाल प्रेस युनियन कैलाली शाखासे बिफेक रोज धनगढीमे आयोजित बधाई तथा सम्मान कार्यक्रममे बोल्टी उहाँ उ प्रतिबद्धता जनाइल रहिट । प्रदेशके सञ्चार क्षेत्रके विकासमे मन्त्रालय सदा तयार रहना उहाँ बटैलै । उहाँ कहलै सुदूरपश्चिम प्रदेशके आम सञ्चार नीति संसदसे पारित कराइक लाग पहिल प्रयास रही । उ नीति प्रेस स्वतन्त्रताके दायराहे अभिन फरछवार बनाई सेक्ना संचार संस्था ओ संचारकर्मी मैत्री बनाई पर्ना बा ।
कौनाफे बाहनामे प्रेस तथा अभिव्यक्ति स्वतन्त्रता खोस्ना खुम्चे नइडेना ओ प्रदेश सरकारके ओरसे मिडिया सम्बन्धी कौनो कानुन वा नीतिगत निर्णय करेबेर संचारकर्मीके सुझाव सल्लाह लेके केल आघे बह्रना बाटमे ढुक्क हुइना आग्रह करलै ।
कार्यक्रममे नेपाली काँग्रेस कैलालीके सभापति नारायणदत्त भट्ट संचारकर्मीनहे पक्षरहित, निष्पक्ष कलम चलैना आग्रह करलै । नेपाल पत्रकार महासंघके केन्द्रीय सदस्य भरत शाह, नेपाल प्रेस यूनियन प्रदेश उपाध्यक्ष टेकेन्द्र देउवा प्रदेशमे संचार नीति नन्ना, यहाँके संचारमाध्यम ओ संचारकर्मीनके अवस्थाबारे प्रदेश सरकार गम्भीर हुइना आग्रह करल रहिट ।
प्रेस युनियन कैलालीके अध्यक्ष श्रवण देउवाके अध्यक्षतामे हुइल कार्यक्रममे संचालन सचिव सिताराम ओझा ओ स्वागत मन्तव्य सुनिल आउजी करल रहिट ।
–
–
