टीकापुर घटनाके बाँकी राजबन्दीके रिहाई कब ?

लोकतान्त्रिक गणतन्त्रसंगे मुलुक संघीयतामे प्रवेश करेक लाग केचरी फेरटेहे प्रदेशके नामांकन, सीमांकनके लाग देशभर राजनितिक आन्दोलन खोबसे चर्कल रहे । सुदूरपश्चिम प्रदेशमे नामांकन ओ सीमांकनके लाग राजनीतिक आन्दोलन हुईबेर भदौै ७ गते टीकापुरमे आन्दोलनकारी प्रहरीविच दोहरो भिडन्तमे हुुईबेर नइसोचल घटना हुइल । जेम्ने एक बालक सहिट आठ जाने सहदात प्राप्त करलै । भदौ ८ गते कर्फयू जारी हुइलबेला थारु समुदायके घर, पसल छानछानके आगजानी हुइल, निर्दोष थारुन उप्पर ज्यान मर्ना मुद्दा, लुटपाट डकैटी मुद्दा दायर हुइल । टमान जाने जिल्ला अदालत, उच्च अदालत, सर्वोच्च अदालतसे तोकल सजय काटके रिहाई हुइल बटै । निर्दोष सन्तराम चौधरी निर्दोष रहटी–रहटी सात बरस जेल जीवन विटैना बाध्य हुइलै । निर्दोेष टमान थारुन उप्पर अभिन मुद्दा लागल बा ।

उ घटना घटेबेर टमान छानविन आयोग बनल, लाल आयोगसे सरकारहे प्रतिवेदनफे बुझाइल मने अभिनसम उ आयोगके बुझाइल प्रतिवेदन सार्वजनिक नइहुइलपाछे घटना रहस्यमय बनल बा । माननीय रेशम चौधरी सोम्मारके रोज १६ औं गणतन्त्र दिवसके अवसरमे कैदमुक्त हुइलपाछे संचारकर्मीनसंग प्रतिक्रिया डेटी लाल आयोग सार्वजनिक हुइलेसे टीकापुर घटनाके सत्यतथ्य सक्कु सत्यतथ्य बाहेर अइना कहठै । आाखिर काहे लाल आयोग सार्वजनिक नइकरके काहे गुमराहमे धारल बा ।

रेशम चौधरी छुटना मजा बाट हो मने उहाँ केल छुटना कोई भारी बाट नइहो । अभिनफे टीकापुर घटनामे मुछल पाँच जाने कारावास जीवन विटैटी रहल बटै । २९ जनहनमे कलंकके धब्बा लागल बा । ओटराके नाही अधिकारके आन्दोलन करेबेर उल्टे थारु समुदायमे जातियताके कलंकके विल्ला लागल बा । लाल आयोगके प्रतिवेदन सार्वजनिक हुइलेसे के दोषी, के निर्दोष सब बाहेर आइट । उ प्रतिवेदनसे कारागार जीवन विटैटी रहल ओ फरारके सूचीमे रहल २९ जनहन उप्पर लागल मुद्दा खारेज हुइट की ? टबमारे सरकार एक फेरा लाल आयोग प्रतिवेदन सार्वजनिक कैना जरुरी बा ।