२०८४ सालमे सरकार बनैबीः रेशम चौधरी

पहुरा समाचारदाता
धनगढी, १५ जेठ । नागरिक उन्मुक्तिके संरक्षक तथा नेता रेशमलाल चौधरी २०८४ सालमे सरकार बनैना घोषणा करले बटै ।

१६ औं गणतन्त्र दिवसके अवसरमे सोम्मार रोज कैदमुक्त हुइल उहाँ अपनेहुक्रन आउर बल्गर हुइल दाबी करटी २०८४ सालमे देशके बागडौर सम्हरना बटैले बटै । मध्यपश्चिम, सुदूरपश्चिम केल नाही यी देशके मुहार, काँचुरी फेर्ना अभियान २०८४ सालसे डेले बा,’ उहाँ कहलै, २०८४ सालमे नागरिक उन्मुक्ती राज कारी, शासन करी ।

नेता चौधरी कहलै ‘हम्रे यी देशमे अपन पहिचान खोजल हुई । काल्हके दिनमे यी राज्यसंग सीमानाकामे सिमेन्टके पिल्लर बनैना, सीमाना घेर्ना पैसा नइरहल बेला भुमिपुत्र थारु समुदाय सालके खुटा गारके सीमाना जोगैले रही ।’

उहाँ कहलै, हम्रे यी देशसे कुछ नइमग्ले रही । यी सरकारसे कुछ नइ मग्ले रही । हम्रे अटरा केल मग्ले रही की, अपनेनके हमार अंगनामे देउसीभैलो खेली ओ हम्रहिनहेफे अपनेनके अंगनामे सखिया नाँच नाँचे डी । एक दुसरके अंगनामे नाँच करे नइपैना, अक्के देशके जनता हुकेफे डाडु भैया कहे नइपैना यी कैसिक राजनीति । मै सोच्नु यी राजनीति कुछ छे जरुर गलट बा । जरुर कुछ घुसपैठ बा । उहे घुसपैठसे रेशम चौधरीके आठ बरस कारावास बैठना बाध्य तुल्याइल ।

मै करागार मुक्त हुुइल बटु । मध्यपश्चिम सुदूरपश्चिमके सपना पुरा कैना हमार काँध आइल उहाँ बटैलै ।

पुनः उच्चस्तरीय आयोग गठनके माग

नागरिक उन्मुक्तिके संरक्षक तथा नेता रेशमलाल चौधरीसे लाल आयोगके प्रतिवेदन सार्वजनिक करे पर्ना ओ टिकापुर घटनाके शुद्ध छानबिन करे पर्ना कहटी ओकर लाग फेरसे उच्चस्तरीय आयोग गठन करे पर्ना बटैले बटै ।

टिकापुर घटनाके निरुपण सरकारसे हाली करे पर्ना बटैटी उहाँ कहलै, ‘टिकापुर घटनाके शुद्ध छानबिन करे परठ । टिकापुर घटना हुइबेर पचासौ हजार मनै खुल्ला आँखीसे घटना हुइल डेख्ले बटै । उ धरातलमे रहल नागरिकसंग पुछे परल । टिकापुर घटनाहे अपन खुल्ला आँखीसे डेखल व्यक्तिहुकनके वयान लेहे परठ, ज जैसिन हुइलेसेफे यिहीहे निराकरण कैना दायित्व राज्यके हो । राज्यसे हाली यकर निराकरण करे परठ ।’

टिकापुर घटनामे दोषी ठहर हुके जेलमे रहल औरफे हाली रिहा हुइना उहाँ बटैलै । अइना कुवाँर ३ गते वा उहीसे आघे ओइनके रिहाइके पहल हुइटी रहल जानकारी उहाँ डेलै ।

थरुहट थारुवान संघर्ष समितिसे २०७२ साल भदौ ७ गते कैलालीके टिकापुरमे करल प्रदर्शनसे हिंसात्मक रुप लेके नेपाल प्रहरीके एसएसपी लक्ष्मण न्यौपानेसहित ८ जानेक मृत्यु हुइल रहे । उहे घटनामे दोषी ठहर हुके आजीवन काराबासके सजाय पाइल चौधरीहे सरकारसे गणतन्त्र दिवसके अवसर पारके सजाय माफी डेहलपाछे चौधरी सोम्मार सकारे रिहा हुइल हुइट ।

रिहापाछे चौधरी माइतीघर, नेपालगंज ओ बर्दियामे कोणसभा

नागरिक उन्मुक्तिके संरक्षक तथा नेता रेशमलाल चौधरीसंग सोम्मारके १६ औं गणतन्त्र दिवसके अवसरमे कैदमुक्त हुइलपाछे काठमाण्डौंके माइतीघर, नेपालगंज ओ बर्दियामे कोणसभा कैले बटै । कैदमुक्त हुके बाहेर आइलपाछे उहाँहे भव्य स्वागत कैगिल बा । दिनभर नेपालगंज, बर्दियामे कार्यकर्ता ओ सुभेच्छुक भेटघाटमे व्यस्ता रहल उहाँ साँझके गृह जिल्ला टीकापुर पुगल बटै । टीकापुरमे उहाँके भव्य स्वागत कैगिल बा ।

ओस्टेक करके मंगरके रोज कैलाली कारागारमे रहल टीकापुर राजबन्दीहे भेटघाट कैना बटैले बटै । कैलाली कारागारमे अभिन चार कारावास जीवन विटैटी रहल बटै । गणतन्त्र दिवसके अवसरमे अपने कैदमुक्त हुइलेसेफे बाँकी टीकापुर राजबन्दीहे अइना कुवाँर ३ गतेसे पहिले रिहाई लाग पहल हुइटी रहल बटैलै । ओस्टेक मंगरके रोज उहाँक कञ्चनपुर जिल्लासम भेटघाट कार्यक्रम तय हुइल पार्टीके नेता लक्ष्मण थारु जनैलै ।

टीकापुर घटनाके बाँकी राजबन्दी कहलै हम्रहिन केल काहे अन्याय

कैलाली कारागारमे रहल टीकापुर घटनाके कैदीबन्दी नागरिक उन्मुक्तिके संरक्षक तथा नेता रेश्मलाल चौधरीसंग अपनेहुकनके रिहाई नइहुइलपाछे अपनेहुक्रे अन्यायमे परल बटैले बटै । सोम्मार रोज १६ औं गणतन्त्र दिवसके अवसरमे नेता रेशम चौधरीसंगे अपनेहुक्रेँ कैदमुक्त हुइना ढेर आशा रहल मने रेशम चौधरी केल छुटलपाछे अपनेहुक्रे दुःखित हुइल बटैले बटै ।

उ पार्टीके नेता लक्ष्मण थारुके अनुसार पूर्व माननीय रेशम चौधरी सोम्मार काठमाण्डौसे नेपालगंज, बर्दिया हुइटी टीकापुर पुगल बटै । काल्ह (मंगर) धनगढी पुग्ख कैलाली कारागारमे रहल टीकापुर घटनाके राजबन्दीहुकन भेटघाट कैना कार्यक्रम रहल बटैलै । मने करागारमे रहल बाँकी कैदीहुँक्रे अपन लाग कुछ पहल नाइहुइल कहटी निराश बनल बटै ।

उहे घटनामे आरोपमे हरिनारायण, प्रदिप, बिरबहादुर चौधरी ओ गंगाराम चौधरी अब्बे कैलाली कारागारमे रहल बटै । ओइनेहुक्रे सरकारमे रहेबेरफे अपनहे केल कैदमाफी कराके कैदमुक्त हुइल कहटी रेशम चौधरीसे कैसिन भेट्ना कना प्रतिक्रिया डेहल परिवारके सदस्य बटैली । प्रदिपके दिदि रञ्जिता कहली –‘आज भैयाफे कैदमुक्त हुइटी बा कना सुनल रहु । विहान फोन करेबेर नइछुट्न प्रतिक्रिया पैनु । अक्के घटनाके कोई छुटना कोई जेलमे सरना काम हुइल बा । यिहीसे हमार मन बहुट पोेलल बा । खुशी मनसे भेटघाट करे नइसेक्ना उहाँ बटैली ।