रेशम चौधरीहे धनगढीमे भव्य स्वागत

पहुरा समाचारदाता
धनगढी, १७ जेठ । नागरिक उन्मुक्ती पार्टीके संरक्षण रेशम चौधरीहे धनगढीमे पार्टीके कार्यकर्ता ओ सर्वसाधारण नागरिकसे बुधके रोज भव्य स्वागत करले बटै ।

गणतन्त्र दिवसके अवसरमे आठ बरसपाछे कैदमुक्त हुइलपाछे धनगढीमे उहाँ पहिल चो सार्वजनिक रुपमे डेखा परल हुइट ।

पार्टीके कार्यकर्ता ओ सर्वसाधारण नागरिकसे स्वागत पाछे सक्कु जनहनहे धन्यवाद ओ बधाई डेटी उहाँ नागरिक उन्मुक्ती पार्टी २०८४ सालके निर्वाचनहे मिसनके रुपमे सुरुवाट करल बटैलै । उहाँ कहलै, सब जाने बुझसेकल बटै, नयाँ शक्ति नागरिक उन्मुक्ती पार्टीके विकल्प नाइहो । अइना चुनावमे नागरिक उन्मुक्ती नेतृत्व करी ।

ओस्टेक कैके बुधके उहाँ कैलाली कारागारमे रहल चार जाने टीकापुर राजबन्दीहुँक्रनहे भेटन कार्यक्रम तय कैगिल रहे । मने चार बजे पाछे कैदी बन्दीनहुकन भेटघाट करे नइमिल्न हुइलपाछे उहाँ कारागारके गेटसे लौटल पार्टीके नेता लक्ष्मण थारु बटैलै ।