किसान ओ सामुदायिक वन विचके विवाद समाधान कैना साझा विकल्प पारित

पहुरा समाचारदात
धनगढी, १८ जेठ । कैलाली जिल्ला जोशीपुर गाउँपालिका–३ बनजरिया स्थित शंकर सामुदायिक वन उपभोक्त समूह ओ बनजरिया गाउँके किसानहुकनके विचमे रहल विवाद समाधानके लाग साझा विकल्प पारित हुइल बा ।

सामुदायिक वनके सीमाना एकिन तथा जग्गा खनजोत सम्बन्धी विवादमे जोशीपुर गाउँपालिका न्यायिक समितिके आर्थिक सहयोग तथा प्राकृतिक श्रोत द्वन्द्व रुपान्तरण केन्द्र नेपालके सहजीकरणमे बुधके रोज बैठल संयुक्त बैठक खाट विधिसे छलफल करटी साझा विकल्प पारित करल हो । जोशीपुर गाउँपालिका उपाध्यक्ष तथा न्यायिक समिति संयोजक रेखादेवी कठरियाके अध्यक्षतामे हुइल कार्यक्रमके वडका पहुना वडा नम्बर ३ के वडा अध्यक्ष रेणुकुमारी डगौरा रहल रहिट ।

कर्यक्रममे कार्यपालिका सदस्य फुलमतिदेवी चौधरी, सोनी चौधरी, सरस्वती डगौरा,राजकुमारी कुमाल, ईसारा तमाट्टा, वडा सदस्य राजेशकुमार चौधरी, शंकर सामुदायिक वन उपभोक्त समूह अध्यक्ष दानसिंह चौधरी,धौथिनिया सामुदायिक वन उपभोक्त समूह अध्यक्ष कालीराम चौधरी, जनजगृति आधारभूत विद्यालयके अध्यक्ष भिखु चौधरी, बड्घर देशराज चौधरी, महिला स्वास्थ्य स्वयम् सेविका ज्योती चौधरी, माकुरा समूह सदस्य, समाजसेवी बुद्धिजीवी सामुदायिक वन उपभोक्त सदस्यलगायत पहुनाके उपस्थिति रहल रहे ।

कार्यक्रम सञ्चालन प्राकृतिक श्रोत द्वन्द्व रुपान्तरण केन्द्र नेपालके सहजकर्ता बन्धु प्रसाद चौधरी ओ स्वागत मन्तव्य सहजकर्ता रिता कुमारी चौधरी करल रहिट ।