कैलारी–५ मे जनकल्याण बहुउद्देश्यीय सहकारीके उदघाटन

पहुरा समाचारदाता
हसुलिया, ३० भदौ । कैलाली जिल्लाके कैलारी गाउँपालिका वडा नम्बर ५ पवेरामे जनकल्याण बहुउद्देश्यीय सहकारी संस्था लिमिटेडके विधिवत उदघाटन कैगिल बा ।

शनिच्चरके रोज पवेरामे हुइल एक समरोहके विच कैलारी गाउँपालिकाके अध्यक्ष राजसमझ चौधरी उ सहकारीके उदघाटन करल रहिट । उदघाटन कार्यक्रममे बोल्टी उहाँ अब्बे मुलुकमे आर्थिक मन्डी लागलबेला यी सहकारीके जलम लेहल यिहिहे टिकैना सक्कु शेयर सदस्य सक्रिया भूमिका निभैना आग्रक करलै । उहाँ कहलै, एक दुई सहकारीके कारण और सहकारीफे बदनामित हुइटी गैल ओरसे चुस्तदुरुस्त हुके काम कैना उहाँ आग्रह करलै । कार्यक्रमके वडका पहुना समेट रहल उहाँ मापदण्ड अनुसार काम करटी कागजात पेस करलेसे पालिकासे हुइना सहयोग कैनाफे प्रतिबद्धता जनैलै ।

कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी यी सहकारीमे रहल पैसा लगानी करलेसे आम्दानीके स्रोत बह्रटी जैना बटैलै । अब्बेक समयमे सहकारी अनिवार्य रहल मने कामहे पारदर्शि बनैना जरुरी रहल बटैलै । पालिकाके अपने कृषि संयोजक रहल ओरसे पालिकासे हुइना सहयोग कैना बटैलै ।

नागरिक उन्मुक्ती पार्टीके प्रदेश सदस्य भीष्म चौधरी अपन पार्टी अब्बे सरकारमे रहल कारण कृषि सम्बन्धी कार्यक्रमके लाग सदैव सहयोग रहना बटैलै । उहाँ कहलै, हमार पार्टी, प्रदेश ओ संघके भूमि व्यवस्था तथा कृषि सहकारी मन्त्रालयके जिम्मेवारीमे बा । यी सहकारीहे आघे बह्राइक लाग सदैव पहल कैना बटैलै ।

पवेरा गाउँके भल्मन्सा खुशीराम चौधरी अब्बे कृषकहे समयमे मलखाद नैपैना समस्य रहल बटैलै । उहाँ कहलै, भारत लग्गे हुइल कारण वहाँसे ल्यानके प्रयोग करल मने आब पवेरामे स्थापना हुइल यी सहकारीसे कुछ सहज हुइना उहाँ विश्वास व्यक्त करलै ।

सहकारीके संचालन समिति सदस्य तेजराम चौधरी पवेरामे बहुत संघर्षके बाबजुत सहकारी स्थापना कैना सफल हुइल बटैलै । उहाँ कहलै, और गाउँमे सहकारी बा, सामुदायिक भवन बा हमार कुछ नइहो कैलारीके सेन्टर पोइन्टमे रहिटके कुछ करे नइसेक्के पाछे परल बटैलै ।

मल खाद विउके और सहकारीमे जाई पर्ना बाध्यता रहल मने आब सहज हुइना उहाँ बटैलै ।

जनकल्याण बहुउद्देश्यीय सहकारी संस्था लिमिटेडके अध्यक्ष प्रेमबहादुर चौधरीके अध्यक्षतामे हुइल कार्यक्रममे स्वागत मन्तव्य लिमिटेडके संस्थापक सदस्य विरबहादुर चौधरी ओ संचालन सचिव विपराम चौधरी करले रहिट । कार्यक्रममे सहकारीके संस्थापक सदस्य, शेयर सदस्यहुकनके सहभागिता रहे ।