निश्राव सहकारी नवौं बरसमे प्रवेश

२६ लाख ६४ हजार निक्षेप संकलन

पहुरा समाचारदाता
धनगढी, १५ कुवाँर । कैलालीके धनगढी उपमहानगरपालिका वडा नम्बर ५ तारानगरमे रहल निश्राव कृषि सहकारी संस्था लिमिटेड नवौं बरसमे प्रवेस करले बा ।

२०७२ सालमे स्थापना हुइल सहकारीके सोम्मारके हुइल साधरण सभा कार्यक्रममे अध्यक्ष दुर्गा कुश्मी संस्थाके गैल वर्षके तुलनामे ५.८० प्रतिशत वृद्धि हुके २०८० असार मसान्तसम संस्थाके कुल निक्षेप रकम २६ लाख ६४ हजार २१९ रुप्या रहल बटैली ।

संस्थाके शेयर पुजी १० लाख ८९ हजार ३ सय रहल ओ २०७९ साल असार मसान्तसम ४०.१२ प्रतिशत वृद्धि हुइल बा । सदस्य संख्या १३५ जाने रहलमे २०८० असार मसान्तसम शेयर सदस्य संख्या यथावत रहल उहाँ जनैली । सस्थासे कर्जा प्रवाह ०७८÷०७९ असार मसान्तसमके लगानी कर्जा रकम रु ४ लाख२३ हजार ८८७ रहल रहे । ओ ०७९÷०८० मे १९.६१ प्रतिशतसे घाट हुके २०८० असारमसान्तसमके लगानीमे रहल कर्जा रू ३ लाख ४२ हजार २३६ रहल उहाँ जनैली ।

संस्थाके लगानी रहटी रहल गैल बर्षके तुल्नामे ३.३२ प्रतिशतसे कम लगानी करल विल्गाइठ । आर्थिक बर्ष २०७८÷०७९ के असार मसान्तसम कुल लगानी ३० लाख ५४ हजार ८४६ रहल ओ २०७९÷०८० असार मसान्तसम कुल लगानी २९ लाख ५६ हजार ७१३ रहल अध्यक्ष बटैली ।

सहकारीके भाखा नाघल ऋण आर्थिक बर्ष २०७८÷०७९ मे ६२ हजार १९८.६२ विल्गाइल मने आर्थिक बर्ष २०७९÷०८० अषाढ मसान्तसम भाका नाघल ऋण शुन्य प्रतिशत रहल उहाँ जनैली ।

मुनाफा आर्जनमे संस्थाके कर्जा लगानीसे प्राप्त हुइना व्याज आम्दानी रकम रु ६ लाख ६० हजार ४९७ रुप्या १४ पैसा ओ खर्च ओर ४ लाख ४६ हजार ५५० रुपया १४ पैसा रहलमे २०७९÷०८० मे कर भुक्तान खुद मुनाफा रु १ लाख ९८ हजार ९७० रुप्या ७१ पैसा आर्जन कैना सफल हुइल बा ।

संस्थाके गुनाफा बाँडफाँडमे आ.व. २०७९÷०८० कर आघेक मुनाफा २ लाख ९३ हजार ९४७ मध्ये हुइ अइना कर १४ हजार ९७६ रुप्या २९ पैसा रकम व्यवस्था करके कर राजश्वमे दाखिला कैगिल बा ।

सहकारी ऐन बमोजिम आयकर पाछेक खुद नाफा रकमसे २५ प्रतिशत जगेडा कोषमे जम्मा करके बाँकी रकमहे शत प्रतिशत मानके उहीसे २५ प्रतिशत संरक्षित कोष, १५ प्रतिशत सहकारी शिक्षा कोष, ३० प्रतिशत शेयर लाभांस कोष, १५ प्रतिशत कर्मचारी बोनस कोष ओ १० प्रतिशत घाट पूर्ति कोष छुट्याई बाँडफाँड करल अध्यक्ष दुर्गा कुश्मी बटैली ।

ओस्टेक करके निश्राव कृषि सहकारी संस्था लिमिटेडके साधरण सभा उदघाटन कार्यक्रममे कुन्ना नारायण चौधरीके वडका पहुनामे कार्यक्रम हुइल रहे । कार्यक्रममे सम्बोधन करटी उहाँ गाउँठाउमे खुलल सहकारी ग्रामीण क्षेत्रके महिलाहुक्रे आ अपनथेन रहल छोट छोट बचत जमा कैना ओ चाहल बेला सहुलियत दरमे ऋण लेके आय आर्जनके काम लगैना सहजुल हुइल बटैलै । उहाँ सहकारी नवौं बरसमे प्रवेस करल उपलक्ष्यमे शुभकामनाफे व्यक्त करल रहिट ।

सहकारीके अध्यक्ष दुर्गा कुश्मीके अध्यक्षतामे हुइल साधरण सभा कार्यक्रममे स्वागत मन्तव्य निर्मला चौधरी ओ संचालन देउमति चौधरी करल रहिट । कार्यक्रममे सहकारीके संरक्षक इन्दिरा चौधरीलगायत शेयर सदस्यहुकनके सहभागिता रहल रहे ।