पत्रकार उन्नती चौधरीसहित तीनजनहन ‘ह्युमन राइट्स अवार्ड’
पहुरा समाचारदाता
काठमाडौँ, १६कुवाँर । टमान विधामे सक्रिय तीनजाने पत्रकार ‘ह्युमन राइट्स अवार्ड’ से सम्मानित हुइल बटै । युरोपियन युनियनके सोम्मार राजदूतावासमे आयोजित एक समारोहके तीनु जनहनहे कदरपत्रसहित सम्मान कैगिल बा ।
अवार्डसे पत्रकार उन्नती चौधरी, चाँदनी हमाल ओ आशिष मिश्र सम्मानित हुइल बटै । चौधरीहे ‘कमलरी प्रथा, मुक्तिके इतिहास ओ वर्तमान’, वालविवाह विषयमे शसक्त रुपमे कमल चलाइल वाफत सम्मान करल हो ।
विगत १७ वर्षसे संचार क्षेत्रमे रहल चौधरी हिमाल खबरमे रिर्पोटिङ करठै कलेसे केर्नीन्यूज डटकम अनलाइनके संचालिकाफे हुइट । ओस्टेक, हमाल गोरखापत्र दैनिक ओ मिश्र द राइजिङ नेपालमे कार्यरत बटै ।
समारोहमे नेपालके लाग युरोपियन संघके ओरसे नवनियुक्त राजदूत भेरोनिक लरेन्जोसे कदरपत्रसहित सम्मान प्रदान करटी तीनु जाने पत्रकारके भूमिकाके उच्च सम्मान करल हुइट । तीनु जाने पत्रकारहे पुरस्कारस्वरुप ईयूसे अइना साता युरोपके शैक्षिक भ्रमणमे बेल्जियम लैजैना हुइल बा । युरोप भ्रमणबारे तीनु जाने पत्रकारहे जानकारी समेत डेहल बा ।
