राष्ट्रिय अपाङ्ग महासंघ नेपालके ३४औँ स्थापना दिवसके अवसरमे विपद् पीडितप्रति श्रद्धाञ्जली तथा राहत कोषमे सहयोग
पहुरा समाचारदाता
धनगढी, १६ भदौ । राष्ट्रिय अपाङ्ग महासंघ नेपालके ३४औँ स्थापना दिवसके अवसरमे राष्ट्रिय अपाङ्ग महासंघ नेपाल, सुदूरपश्चिम प्रदेश कार्यसमितिसे कौनोफे मनोरञ्जनात्मक कार्यक्रम नैकरके विपदमे परके ज्यान गुमाइल नागरिकप्रति श्रद्धाञ्जली अर्पण करटी विपद् प्रभावित परिवारहे सहयोग कैना निर्णय करले बा ।
सुदूरपश्चिम प्रदेश कार्यसमितिसे यिहे २०८३ भदौ १० गते बिहान भोटेकोशी लडियामे आइल बाढमे परके ज्यान गुमाइल डाईबाबा, डाडुभैया तथा दिदीबहिनीयाप्रति हार्दिक श्रद्धाञ्जली अर्पण करले बा । साथै, बाढी तथा विपदमे परके घाहिल हुइलहुकनके शीघ्र स्वास्थ्यलाभके कामना करटी प्रभावित परिवारप्रति गहिर समवेदना व्यक्त करले बा ।
स्थापना दिवसके अवसरमे प्रदेश कार्यसमितिसे विपद्के यी दुःखद् घडीमे पीडित तथा प्रभावित समुदायप्रति ऐक्यबद्धता जनैटी प्रधानमन्त्री दैवी प्रकोप उद्धार कोषमे रु. ५ हजार ५५५ सहयोग कैना निर्णय करल हो ।
उ सहयोग रकम राष्ट्रिय अपाङ्ग महासंघ नेपाल, सुदूरपश्चिम प्रदेशके सक्कु पदाधिकारी, सल्लाहकार, कर्मचारी, सदस्य संस्था तथा सहयोगी महानुभावहुकनके सामूहिक योगदानके रूपमे प्रधानमन्त्री दैवी प्रकोप उद्धार कोषमे प्रदान कैना जनाइल बा ।
प्रदेश कार्यसमितिके बैठकसे उ निर्णय सर्वसम्मत रूपमे पारित करल हो । महासंघसे विपद्के समयमे सक्कु नागरिक, विशेष करके अपाङ्गता हुइल व्यक्ति तथा अन्य जोखिममे रहल समुदायके सुरक्षा, पहुँच ओ समावेशी राहत तथा उद्धारहे प्राथमिकतामे रख्न सम्बन्धित निकाय तथा सरोकारवालाहे आग्रहसमेत करले बा ।
राष्ट्रिय अपाङ्ग महासंघ नेपालके ३४औँ स्थापना दिवसहे दुःखके यी घडीमे उत्सवसेफे मानवीय संवेदना, सामाजिक उत्तरदायित्व ओ विपद् प्रभावित नागरिकप्रतिके ऐक्यबद्धताके दिवसके रूपमे मनैना निर्णय करल प्रदेश कार्यसमिति प्रदेश कार्य अध्यक्ष नन्दराज भट्ट जनैलै ।
उ कार्यक्रममे राष्ट्रिय अपाङ्गता महासंघ केन्द्रीय कोषाध्यक्ष रमेश बस्नेत, ओस्टेक करके राष्ट्रिय अपाङ्ग महासंघ सुदूरपश्चिम प्रदेशके सल्लाहकार समिति संयोजक हरिदत भट्ट ओ राष्ट्रिय अपाङ्ग महासंघ सुदूरपश्चिम प्रदेश प्रवक्ता रूपा रानी लाहि लगायत पैंचालीस जानेक उपस्थिति रहे ।
उ कार्यक्रमके अध्यक्षता राष्ट्रिय अपाङ्ग महासंघ सुदूरपश्चिम प्रदेशके अध्यक्ष नन्दराज भट्ट करल रहिट ।
