थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०२ सावन २६४८, बुध ]
[ वि.सं २ श्रावण २०८१, बुधबार ]
[ 17 Jul 2024, Wednesday ]

प्रतिनिधि सभाके उपभोक्ता हित समितिसे सरोकारवालासंग छलफल

पहुरा | २४ आश्विन २०८०, बुधबार
प्रतिनिधि सभाके उपभोक्ता हित समितिसे सरोकारवालासंग छलफल

पहुरा समाचारदाता
धनगढी, २४ कुवाँर ।
प्रतिनिधि सभाके उद्योग तथा वाणिज्य ओ श्रम तथा उपभोक्ता हित समितिसे उपभोक्ता अधिकारके बारेमे सरोकारवालासंग छलफल करले बा ।

समितिसे बुधके धनगढीमे दैनिक उपभोग्य वस्तु लगायत आपूर्ति व्यवस्थापनबारे सरोकारवालासंग छलफल करल हो । समितिके सभापति एवम् प्रतिनिधि सभा सदस्य अब्दुल खानसे से उपभोग्य वस्तु ओ सेवा गम्भीर मानव अधिकारसंग जोरल विषय रहल यम्ने कौनोफे सम्झौता हुइसेक्ना बटैलै ।

“यदि, मुलुकहे समृद्ध बनैना बा कलेसे स्वस्थ देश हुइना आवश्यक बा”, उहाँ आघे थप्लै,“स्वस्थ देश बनैना स्वस्थ उपभोग्य वस्तु हुई परठ ।” जौनफे तह ओ तप्कामे रहल व्यक्ति उपभोक्ता रहल उल्लेख करटी खानसे नेपालीहुकनके किनमेलके गन्तव्य भारत बनलमे चिन्ता व्यक्त करलै ।

उहाँ वस्तु भारतमे किनके नेपालमे गुणस्तर खोज्न परिपाटी रहल टिप्पणी करलै । वस्तुके गुणस्तरके लाग अपनही उत्पादन कैना आवश्यक रहल सभापति खानके जोड रहे । छोटसे छोट वस्तु भारतमे किन्न परिपाटी विकासके बाधक रहल उहाँ स्पष्ट परलै ।
ओस्टेक, समितिके सदस्य हेमराज राई बजारमे रसायनयुक्त खाद्य सामग्रीके बिक्री वितरण हुइटी रहल ओरसे उहीहे नियन्त्रणके लाग सक्कस गम्भीर रुपमे लागे पर्ना औंल्यइलै । उहाँ बजार अनुगमन कैना सरोकारवाला निकायहे मजासे योजना बनाके वर्षभर अनुगमनमे सक्रिय हुइना आग्रह करलै ।

समितिके दुसर सदस्य रेखा यादव व्यापार व्यवसायमे खुलेयाम भ्रष्टाचार हुइटी रहल जिकिर करटी उहीहे नियन्त्रण करे पर्नामे जोड डेलै । अनुगमनमे जउइया इमानदारिता देखाई पर्ना उहाँक कहाई रहे । ओस्टेक करके समितिके सदस्य कान्तिका सेजुवाल कर्मचारीतन्त्र स्थायी सरकार रहल कारणसे नागरिकके खाद्य अधिकारके रक्षाके लाग गम्भीरतापूर्वक लग्ना आग्रह करलै । महंगी नियन्त्रण कैना ओ नागरिकहे सहज ढंगसे सेवा डेना सवाल महत्वपूर्ण रहल उहाँक कहाई रहे ।

छलफल कार्यक्रममे सम्बन्धित विषयगत कार्यालयसे उपभोक्ता अधिकारके सवालमे आ–आफ्ना कार्यालयसे करटी आइल कामके बारेमे जानकारी करैले रहिट । कञ्चनपुरके प्रमुख जिल्ला अधिकारी गोपालकुमार अधिकारी अपन जिल्लामेफे समय समयमे बजार अनुगमन हुइटी रहल बटै । उहाँ उपभोक्ता ओ व्यापारी दुनुमे सचेतनाके कमी रहल औंल्यइटी ओइनहे सचेत बनाई पर्नामे जोड डेलै ।

ओस्टेक करके कैलालीके सहायक प्रमुख जिल्ला अधिकारी यज्ञराज जोशी कैलालीमे आठ ठो सेक्टर बनाके बजार अनुगमनके कार्य हुइटी रहल जानकारी डेलै । प्रत्येक सेक्टरसे आ–अपन अनुकूल बजार अनुगमन करके जिल्ला प्रशासन कार्यालयहे प्रतिवेदन पठैना करल उहाँ उल्लेख करलै ।

जनाअवजको टिप्पणीहरू