धनगढीमे प्रदेश स्तरीय महिलावादी मञ्च हुइना
पहुरा समाचारदाता
धनगढी, २४ कुँवार । धनगढीमे विफेक रोजसे सुदूरपश्चिम प्रदेश स्तरीय महिलावादी मञ्च २०८० हुइना हुइल बा ।
‘न्याय, समानता ओ पर्यावरणीय अधिकारके सुनिश्चितता ः सामाजिक रुपान्तरण सहितके दिगो विकासमे सुनिश्चितता’ कना मूल नारा सहित आज कुँवार २५ गतेसे २६ गतेसम दुइदिन शुभश्री प्यालेसमे उ कार्यक्रम हुइना हुइल हो ।
मञ्चमे मुख्य कैके महिलाके श्रमके अधिकार, शरीर ओ पर्यावरणीय न्याय, मानवीय संकट ओ महिलाके नेतृत्वके सवालमे प्यानल छलफल हुइना जानकारी डेहल बा ।
महिला मानव अधिकार रक्षकहुक्रनके राष्ट्रिय सञ्जालके संस्थापक अध्यक्ष डा. रेणु अधिकारी सामाजिक रुपान्तरण ओ महिलावादि दृष्टिकोणसे सुदूरपश्चिम प्रदेशमे विद्यमान सवालहे विश्लेषण तथा सम्वोधन कैना कार्यक्रमके मुख्य उद्देश्य रहल बटैली ।
यकर साथे उहाँ नवनिर्वाचित जनप्रतिनिधीहुक्रनहे रुपान्तरीत नेतृत्व ओकर महत्वबारे धारणागत स्पस्टता लानक लाग ओ मानव अधिकारके क्षेत्रमे क्रियाशील टमान समूह, सञ्जाल, संस्था ओ स्थानीय तहके जनप्रतिनिधी बिच समन्वय ओ सहकार्यके लाग वातावरण तयार कैना रहल बटैली ।
विफे रोज २५ गते सकारे ९ बजे उद्घाटन हुइना कार्यक्रमके बर्का पहुना उद्योग पर्यटन वन तथा बातावरण मन्त्री रमेश धामी रहना जनाइल बा । खास पहुनामे उपसभामुख कोइली देवी चौधरी ओ पहुनामे प्रदेश सभा सदस्य सन्तोष थापा, जुना दानी, ललिता सुनार, तुलसी देवकोटा, लक्ष्मी विक, गीता चौधरी, खेमा देवी विष्ट, इन्द्रा गिरी, जानकी ऐर, देवी कुँवर, पालिका प्रमुख ओ उपप्रमुख लगायत रहना जनाइल बा । महिला मानव अधिकार रक्षकहुक्रनके राष्ट्रिय सञ्जाल लगायत टमान संघसंस्थाके आयोजनामे हुइना कार्यक्रममे प्रदेशके ९ जिल्लाके ८८ पालिकाके महिला जनप्रतिनिधी, महिला मावन अधिकार रक्षक, महिला अधिकारके क्षेत्रमे काम करुइया संघसंस्थाके प्रमुख, स्थानीय सरकारके पदाधिकारी, सञ्चारकर्मी ओ महिला अधिकारकर्मी सहित ३ सय ढेरके सहभागिता रहना जनाइल बा ।
कार्यक्रमबारे जानकारी डेहक बुधके महिला मानव अधिकार रक्षक संजालहरुको राष्ट्रिय सञ्जालके प्रदेश अम्बिका भण्डारीके अध्यक्षतामे हुइल कार्यक्रममे संजालके केन्द्रीय अध्यक्ष श्याम शाह महिलाहुकनके अवस्थाबारे जानकारी डेहल रहिट । कार्यक्रमके संचालन ओरेक कैलालीके जिल्ला संंयोजक गीता चौधरी करल रही ।
