तरुण दलके स्थापना दिवसमे दिप प्रज्वलन कार्यक्रम

पहुरा समाचारदाता
हसुलिया, १० कार्तिक । नेपाल तरुण दलके ७१ औं स्थापना दिवस आज कैलाली जिल्लाके कैलारी गाउँपालिका वडा नम्बर ७ रामपुरमे दिप प्रज्वलन कार्यक्रम कैके मनागिल बा ।

कैलारी गाउँपालिका वडा नम्बर ७ तरुण दल वडा कार्यसमिति क्षेत्र नम्बर ३ के आयोजनामे हुइल कार्यक्रममे नेपाली काँग्रेस कैलारी गाउँपालिका सभापति कृष्णप्रसाद चौधरी, नेपाली काँग्रेस महाधिवेशन प्रतिनिधि सुनिल थापा, नेपाली काँग्रेस वडा सभापति, तरुण दलके प्रतिनिधिहुकनके सहभागिता रहल रहे । तरुण दल कैलालीके अध्यक्ष तथा कैलारी गाउँपालिका वडा नम्बरके वडा अध्यक्ष दिपेन्द्र बहादुर बम तरुण दलके स्थापना दिवस टमान कार्यक्रमके साथ मनागिल बटैलै । उहाँ कहलै, और ठाउँमे खाद्य वितरण लगायत कार्यक्रमके मनागिल बा । यहाँ दिप प्रज्वलन कैगिल हो ।

ओस्टेक करके नेपाल तरुण दल कैलालीसे स्थापना दिवसके अवसरमे धनगढीके आमाको माया छात्रबासहे खाद्य सामग्री हस्तान्तरण करले बा । तरुण दलके ७१ औ स्थापना दिवसके अबसरमे खाद्य सामग्री बितरण करल हो ।

युवाहुक्रे सामाजिक कार्यमे अग्रसर हुई पर्ना सन्देश डेना परोपकारी अभियान करके स्थापना दिवस मनाइल नेपाल तरुण दलके निराजन खड्का जानकारी डेलै । आमाको माया छात्रबासहे चामल, अण्डा, दाल ओ चाउचाउ हस्तान्तरण करल खड्का जानकारी डेलै ।