सुदूरपश्चिममे डसियामे ९ जानेक दुर्घटनामे मृत्यु

पहुरा समाचारदाता
धनगढी, १२ कार्तिक । सुदूरपश्चिम प्रदेशमे डसियाके बेला हुइल गाडी दुर्घटनामे ९ जानेक मृत्यु हुइल बा ।
प्रदेश ट्राफिक प्रहरी कार्यालय अत्तरियाके अनुसार घटस्थापनासे पूर्णिमासम हुइल दुर्घटनामे ९ जानेक मृत्यु ओ ११ जाने घाहिल हुइल बटै ।

प्रदेश ट्राफिक प्रहरी कार्यालके प्रवक्ता प्रहरी नायब उपरीक्षक (डीएसपी) अनिल उप्रेतीके अनुसार अवधिमे कैलालीसहितके पाँच जिल्लामे केल गाडी दुर्घटना हुइल बटै । कैलालीमे हुइल १० दुर्घटनामे पाँच जानेक मृत्यु हुइल बा । डडेल्धुरा, बझाङ, अछाम ओ बाजुरामे थप एक÷एक जानेक मृत्यु हुइल प्रहरी नायब उपरीक्षक उप्रेती बटैलै ।

विगतके वर्षजस्टे यी वर्षफे दुई पाङग्रे सवारीसाधन ढेर दुर्घटनामे परल बाटै । गैल वर्ष डसिया ओ डेवारीके बेला हुइल २४ ठो दुर्घटनामे परके ८ जानेक मृत्यु हुइल रहे । कलेसे ४४ जाने घाहिल हुइल रहिट । यी वर्ष भर डसियाके बेला केल ९ जाने दुर्घटनामे ज्यान गुमैले बटै ।

प्रदेश ट्राफिक प्रहरी कार्यालय अत्तरियासे भर दुई पाङग्रे सवारीसाधन ओ पैदल यात्रीहे ठक्कर डेके मृतकके संख्या ढेर डेखलेसेफे भारी खालके दुर्घटना नइहुइनामे सन्तोषजनक मन्ले बा । ‘यी वर्ष एक्के दुर्घटनासे ढेरके ज्यान जैना खालके भारी दुर्घटना हुइल नइहो । दुई पाङग्रे सवारीसाधन ओ पैदल यात्रीहे ठक्कर डेके मृतकके संख्या बह्रल बा’, डीएसपी उप्रेती कहलै, ‘डसियामे सञ्चालन करल जनचेतनामूलक कार्यक्रम, चालक ओ स्वयं यात्रु सचेत हुके यी वर्ष ढेरजे क्षति व्यहोरे नइपरल ।’