नेता रैका के १८ औँ स्मृति दिवसमे सेभ हाउसमे खाद्यान्न सहयोग

पहुरा समाचारदाता
धनगढी, १५ कार्तिक । राष्ट्रियता लोकतन्त्र ओ समरुपतावाद प्रति समर्पित, दलित मुक्ति आन्दोलनके अगुवा योद्धा,एवं समरुपतावादी नेता स्व.चन्द्र वहादुर रैका के १८ औँ स्मृति दिवस विविध कार्यक्रमके साथ गोदावरी नगरपालिकाके अत्तरियामे मनाइल बा ।

चन्द्र पशुपति रैका स्मृति प्रतिष्ठानके आयोजनामे सम्पन्न कार्यक्रमके वडका पहुना सुदूरपश्चिम प्रदेशके निवर्तमान सामाजिक विकास राज्यमन्त्री टेकवहादुर रैका रहल रहिट ।

कार्यक्रममे उहाँ स्व. रैका शोषित पीडित जनताके लाग मरमेट्न एक सच्चा क्रान्तकारी योद्धा रहल बटैलै । स्व.रैकासे अगालल समरुपतावादी सिद्धान्त अब्बेफे महत्वपूर्ण ओ सान्दर्भिक रहल विचार व्यक्त कैनाके साथे भावपूर्ण श्रद्धाञ्जली अर्पण करलै ।
कार्यक्रमके सहभागीहुक्रे स्व. रैका एक सच्चा देशभक्त ईमान्दार ओ दलित एवं सिमान्तकृत वर्ग समुदायके लाग सदा संघर्षशिल नेता रहल बटैटी राष्ट्रियता लोकतन्त्र मानवअधिकार समाजिक न्याय समानता ओ दलित मुक्ति आन्दोलनमे स्व.रैकाके अतुलनिय ओ अनुकरणीय योगदान रहल बटैटी भावपूर्ण श्रद्धान्जली अर्पण करल रहिट ।

यिहे विच रैकाके १८ औँ स्मृति दिवसके अवसरमे गोदावरी नगरपालिका अत्तरिया स्थित सेभ हाउसमे रहल असहाय÷विपन्न महिला ओ बालबालिकाहुकनहे खाद्य तथा पोषण, सरसफाइ सामाग्री सहयोग करल बा । जेम्ने चामल २५ केजी, दाल ४ केजी, भुजा १० प्याकेट, चिउरा ३ प्याकेट, चाउचाउ १ पेटी, नुन ५ प्याकेट, बिस्कुट १, पेटी, साबुन १२ पिस, निरमा ६ प्याकेट, कोलगेट २ पिस लगायतके खाद्य सामाग्री सहयोग करल रहे ।

उ सामाग्री कार्यक्रमके वडका पहुना निवर्तमान राज्यमन्त्री टेकवहादुर रैकासे महिला तथा वालवालिका सेभ हाउसके वरिष्ठ उपाध्यक्ष एंव महाकाली अस्पताल विकास समितिके अध्यक्ष डा. नर बहादुर मौनी ओ सेभहाउसके आजिवन सदस्य धना चोखालहे हस्तान्तरण करल रहिट । कार्यक्रममे सेभ हाउसके वरिष्ठ उपाध्यक्ष डा. मौनी, धना चोखाल, चन्द्रपशुपति रैका स्मृति प्रतिष्ठानके सचिव राजेन्द्र रैका लगायतसे मन्तव्य करले रहिट ।