राष्ट्रिय अपाङता महासंघसे प्रदेश सरकारके गतिविधिमे सहभागीता नइजनैना

पहुरा समाचारदाता
धनगढी, १६ कार्तिक । नीति, कार्यक्रम ओ बजेटमे वेवास्ता करल ओरसे राष्ट्रिय अपाङ महासंघ नेपालसे सुदुरपश्चिम प्रदेश सरकारके गतिविधिमे सहभागिता नइजैना जनैले बा ।

महासंघके प्रदेश सचिव नन्दराज भट्ट २०८० असार १९ गते ओ २९ गते सामाजिक विकास मन्त्रालयके माननीय सामाजिक विकास मन्त्रीके अध्यक्षतामे बैठक बैठकके करल सहमति कार्यान्वयन नइकरल ओरसे प्रदेश सरकारके गतिविधि ओ सामाजिक विकास कार्यालय, स्वास्थ्य कार्यालयके गतिविधिमे सहभागिता नइजनैना कहले बटै ।

सुदुरपश्चिम प्रदेशमे रहल अपाङता रहल व्यक्तिहुकनके हक अधिकार स्थापित करैना उद्देश्यसे गैल असार १२ से १८ गतेसम्म शान्तिपुर्ण रयाली, जुलुस, रिले अनसन, सिट्टि फुक्न, मुख्यमन्त्री गेट आघे धर्ना, अनसन, शरिरके कपडा फुकाके प्रदर्शनलगायत टमान विरोधके कार्यक्रम कैगिल रहे । उहे आन्दोलनके क्रममे असार १८ गते साँझ स्वयम माननीय मुख्यमन्त्री आन्दोलन स्थलमे पुगके माग सम्बोधन कैना प्रतिवद्धता पश्चात आन्दोलन स्थगित करके वार्तामे गैल रहिट ।

प्रदेश सरकार ओ महासंघ विच यी सहमति हुइल रहे । अपाङता प्रादेशिक नीतिहे आवश्यक सल्लाह सुझाव संकलन करके क्याविनेटसे पास करके लागु कैना कहल रहे । अपाङगता रहल व्यक्तिहुकनके वास्तविक आवश्यकतामे आधारित स्वास्थ्य पुनस्र्थापना सेवा, सहायक सामाग्री उत्पादन तथा मर्मत केन्द्र, अडियो लाईब्रेरी भवन, समावेसी खेलकुद संचालन महासंघके भवन निर्माण, सुप समावेसी विद्यालयके छात्रवास निर्माणके लाग थप पाँच करोड बजेट विनियोजन कैना कहल रहे ।
ओस्टेक अपाङता प्रादेशिक निर्देशन समितीके कार्यविधि संसोधन करके कार्यकारी उपाध्यक्षके व्यवस्था करके सक्कु मेरिक अपाङता रहल व्यक्तिहुकनके सहभागिता करैना कहल रहे ।

आ. व. २०८० ÷ ०८१ मे प्रदेश सरकारसे अपाङता रहल व्यक्तिहुकनके लाग विनियोजन करल बजेट ओ कार्यक्रम संचालन मापदण्ड बनाईबेर अपाङता रहल व्यक्तिहुकनके सहभागितो निर्माण कैना कहलेसेफे उ अनुरुप कार्यक्रम संचालन मापदण्ड निर्माण नइहुइल ओ सहमति बेगर अपाङता हुइल व्यक्तिसे संचालित संघ संस्थासंग कौनो सरोकार नइहुइना करके कार्य संचालन मापदण्ड निर्देशिका बनाके कार्यान्वयनमे नानल बुझल ओरसे उ कार्यके घोर भत्सर्ना करटी अब उपरान्त मन्त्रालय ओ मन्त्रालय मातहतके सामाजिक विकास कार्यालय ओ स्वास्थ्य कार्यालयसे आयोजना कैना कौनोफे अपाङता सम्बन्धि कार्यक्रम ओ गतिविधिमे महासंघमे आवद्ध सदस्य संस्था सहभागि नइहुइना प्रदेश सचिव भट्ट कहले बटै ।