सुदूरपश्चिम प्रहरीमे क्युआर कोड मार्फत गुनासो तथा उजुरी करेसेक्ना
पहुरा समाचारदाता
धनगढी, १७ कात्तिक । सुदूरपश्चिम प्रदेश प्रहरीमे अनलाइन क्युआर कोड मार्फत पिडीतसे गुनासो तथा उजुरी करे सेक्ना हुइल बाटै । शुकके सुदूरपश्चिम प्रदेश प्रहरी प्रमुख डिआईजी भरत बोहोरा धनगढीस्थित प्रदेश प्रहरी कार्यालयमे उजुरी तथा गुनासो सुनुवाईके लाग क्युआर कोडके उद्घाटन करल करल हुइट ।
प्रहरी शुकसे लागु हुइना मेरके क्युआर कोड स्कान कैके गुनासा तथा उजुरी करे मिल्ना व्यवस्था मिलैले बा । परम्परागत उजुरी पेटिकासे गुनासा व्यवस्थापन ओत्र प्रभावकारी नैहुइल ओरसे प्रविधि मार्फत उजुरी तथा गुनासा सुनुवाई करे सेक्ना मेरके सुरु करल डिआइजी बोहोरा बटैलै ।
उहाँ कहलै ‘आब इ व्यवस्थामार्फत जे जहाँसे फेन उजुरी तथा गुनासो करे सेकी, उ गुनासा सम्बोधनके लाग अलग्गे युनिट बनाइल बा तत्काल रिस्पोन्स हुइ।’
शुकसे प्रदेश प्रहरी कार्यलयमे क्युआर कोडके सेवा सुरु करल बा कलेसे क्रमशः जिल्ला, इलाका हुइटी तल्ला युनिटसम फेन इ सेवा लागु करजैना डिआईजी बोहरा बटैलै ।
