लडिया तटिया क्षेत्रमे गन्ना खेती उपयुक्तः गापा उपाध्यक्ष

पहुरा समाचारदाता
हसुलिया, १७ कार्तिक । कैलारीके बाढी डुबान क्षेत्रके गन्ना खेती कैना आवश्यक गाउँपालिका उपाध्यक्ष भगवतीकमुारी चौधरी बटैली ।

आर्थिक विकास मार्फत जोखिम व्यवस्थापन (एमरेड) परियोजना अन्र्तगत उखु खेती प्रवद्र्धनके लाग लाग बहुसरोकारसँगके बैठकमे उहाँ कैलारी लडियाके तटिया क्षेत्रमे गन्ना खेती कैना जरुरी रहल बटैली ।

उहाँ कहली, ‘कैलारीमे मोहना, घुरहा, घुरही, कटैनी लडियाके कारण बर्षेणी डुबान हुके बाली नष्ट हुइटा । खेती योग्य जमिन कटान, पटान हुइटा असिन ठाउँमे गन्ना खेती कैलेसे बाढ प्रकोप नियन्त्रण करे सेक्जाई ।’

गन्ना नगदेवाली हुइल कारण मजासे करे सेक्लेसे धान गोहुँसे मजा आम्दानी करे सेक्जाई,’ गाउँपालिका उपाध्यक्ष कहली, ‘लडिया कटान, डुबान क्षेत्रमे गन्ना खेती करलेसे कटान रोक्नाके आम्दानी करे सेक्जाई ।’ कैलारी गाउँपालिकामे टमान पकेट क्षेत्र रहल ओरसे आब लडिया तटिय क्षेत्रके किसान गन्ना खेती जरुरी विल्गाइठ उहाँ कहली ।

कैलारीमे चैते धान, गोहुँ, तोरी, आलु, मकै लगायतके पकेट छुटयाके पालिकासे अनुदानमे सहयोग करल उपााध्यक्ष बटैली ।
कैलाली लगायत कैलारीमे पहिले गन्ना खेती करल मने बजारीकरणके कारण गन्ना खेती छोरल बटैली ।

कैलारी गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे वडा नम्बर ३ के वडा अध्यक्ष सन्तराम चौधरी वडा नम्बर ३, ४, ५, ओ ७ के लडिया तटिय क्षेत्रमे गन्ना खेती करे सेक्ना बटैलै । वडा नम्बर ७ के वडा अध्यक्ष दिपेन्द्रबहादुर बम वडा नम्बर ७ मे ढेर भुभाग पानीके डुबान रहल ओरसे किसानहुकनहे उ क्षेत्रमे गन्ना खेतीके लाग प्रोत्साहन कैना जरुरी रहल बटैलै ।

गाउँपालिकाके निमित्त प्रमुख प्रशासकीय अधिकृत गणेश प्रसाद मिश्र गन्ना खेती करलेसे धाववालीसे ढेर आम्दानी करलेसे करे सेक्ना बटैलै । सामाजिक विकास शाखा प्रमुख यगम कलेल कैलारी पहिलेफे गन्ना खेती हुइल मने किसान काहे उ खेती छोरल उहीहे अध्ययन कैना जरुरी रहल बटैलै ।

नवजीवन सहकारीके एमके जोशी किसानहुक्रे गन्ना खेतीके लाग सहकारीसे कृषि लोन लेहे सेक्ना बटैलै । कोई किसान कृषि लोन लेहे चाहलेसे लगानीमे कौनो समस्या नइरहल बटैलै ।

भजनी नगरपालिका चर्रा सिडिएमसीके कल्पना कठरिया अपनेहुक्रे ३ बरससे गन्ना खेती करटी आइल बटैली । चर्रामे गन्ना खरिदके लाग डिपो नइरहल ओरसे धनगढी, कञ्चनपुर गन्ना नाने परल बटैली । उहाँ कहली, गन्ना किसानसे लाग लग्गे डिपो नइरहल समस्या झेल्टी आइल मने धान गोहुँसे मजा आम्दानी हुइल बटैली ।

कैलारी गाउँपालिका वडा नम्बर ७ बसन्ता सिडिएमसीके अध्यक्ष महाविर चौधरी अपनेहुक्रे यी बरससे गन्ना खेती सुरुवाट कैना सोचमे रहल बटैलै । उहाँ कहलै, लडिया कटान क्षेत्रमे गन्ना लगाइलपाछे कटान नियन्त्रण हुइल बटैलै । जौन ठाउँमे गन्ना लगैली उ ठाउँमे कटान नइहुइल, उहाँ कहलै, जहाँ गन्ना नइलगाइल रहे । उ ठाउँमे कटानमे हुइल बा । टबमारे लडिया कटान क्षेत्रमे गन्ना खेती कैना सोच बा, अध्यक्ष महाविर कहलै ।

कैलारी–७ हौसलपुरमे महादेव चौधरी अपनेहुक्रे १८÷२० विघामे गन्ना खेती करल मने बजारीकरणके समस्या रहल बटैलै ।
कार्यक्रममे कृषि ज्ञान केन्द्रके रामनारायण चौधरी, भागेश्वर सुगरमिलके एमडी डिएन पाण्डे गन्ना खेतीसे हुइना फाइदाबारे जानकारी डेहल रहिट ।

कार्यक्रमके उद्देश्य तथा स्वागत मन्तव्य सिसिएस कैलालीके महासचिव गणेशदेव पार्की ओ सहजीकरण कार्यक्रम संयोजक मनिराज पाण्डे करल रहिट । कैलारी गाउँपालिकाके समन्वयमे सिसिएस कैलालीके आयोजना मर्सिकोर नेपाल ओ एमरेडके आर्थिक सहयोगमे कार्यक्रम हुइल रहे ।