संस्कृति विस्राके विकृति नैल्यना आग्रह

पहुरा समाचारदाता
हसुलिया, १९ कार्तिक । कैलाली जिल्लाके कैलारी गाउँपालिका वडा नम्बर ३ मे डिया डेवारी सांस्कृतिक कार्यक्रम हुइल बा ।

थारु समुदायके परम्परागत कला, संस्कृति, भाषा संरक्षणके लाग राष्ट्रिय थारु कलाकार मञ्च सुदूरपश्चिम प्रदेशके आउोजनामे कार्यक्रमके आयोजना कैगिल हो । कार्यक्रमके सहभागी पहुनाहुक्रे थारु समुदायके परम्परा संस्कृति विस्राके बाहिय संस्कृति नइअपनैना आग्रह करले बटै ।

डिया डेवारी सांस्कृतिक कार्यक्रमके वडका पहुना कैलारी गाउँपालिकाके उपाध्यक्ष भगवतीकुमारी चौधरी युूवा पिढी अपन विस्रैटी ओ बाहेरके संस्कृतिहे अपनैटी आइल बटैली । खास कैके टरटिहुवारहे रख्ना सांस्कृतिक कार्यक्रम थारु समुदायके परम्परागत संस्कृति झल्कैना कार्यक्रम रख्लेसे मजा हुइट, गाउँपालिका उपाध्यक्ष कहली, ‘अब्बे अपन संस्कृतिहे महत्व डेनासेफे बाहिय संस्कृति अंगल्टी आगैल डेखजाटा । अपन रिति, संस्कृति सीपहे विस्रैटी गैल विल्गटा । पहिचान जोगाइक लाग आब अपन भाषा संस्कृति अनुसार कार्यक्रम करी ।’

उहाँ कहली, ‘थारु समुदायमे पहिले फुर्सदके समय गोँरी विनजाए । अपन विनल ढकिया, छिटवा, बन्ठी, खैचा, डिलियालगायतसे प्रयोग करी मने अब्बे प्लाष्टिक भाडा नानके प्रयोग करठी । मेहनत करे छोरटी । प्लाष्टिक भाडासे हमार स्वास्थ्यके लाग मजा नइहो । प्लाष्टिक भाडाके प्रयोग बह्रटी जाके हमार पहिचान रहल सक्कु चिज विस्थापित हुइटी जाइटा ।’

आब अपनेहुक्रे अपन खेतुवाके खाली ठाउँमे पुञ्जा, कसुङगा लगाई गाउँपालिका ओकर बजारीकरणके जिम्मा लेना गाउँपालिका उपाध्क्ष्यक्ष बटैली । गीत बाँस संरक्षणके लाग गाउँपालिकासे वडा नम्बर ४ मे मन्डरा बजैना तालिमके आयोजना करे जाइटी । काहे की आज काल्ह मन्डरा बजैना मनैनफे नइमिल्ठुइट ।

कैलारी गाउँपालिकाके पूर्व उपाध्यक्ष लक्ष्मी सत्गौवा अपनेफे कलाकारिता क्षेत्रसे सुरुवाट कैटी राजनिति ओर प्रवेश करल बटैटी कलाकारिताके माध्यमसे समाज परिवर्तन करे सेक्ना बटैली । उहाँ कहलै, अब्बे कलाकारिता क्षेत्र बहुट फडको मारसेकल बा । कलाकारहुक्रे पुरान परम्परागत संस्कृति संरक्षण करेसेक्ही ।

थारु कल्याणकारी सभाके केन्द्रीय सदस्य रामचरण चौधरी थारु समुदाय गीतबाँस, संस्कृतिके धनी समुदाय रहल मने परम्परागत रिति संस्कृति, गीतबाँस हेरैटी गैल बटैलै । उहाँ कहलै, ‘थारु समुदाय पहिले समय अनुसार गीतबाँस गाइट, नाँच करिट, अब्बे उ हेरैटी जाइट । सम्ह्रौटी, सजना, मागर, मैना, ढुमरु, बरकीमार, भिन्सरीयालगायत मेरमेरिक नाँच कार्यक्रममे सिमित हुइल बा ।’

जानकी गाउँपालिकाके पूर्व उपाध्यक्ष उमादेवी महतो भाषा, कला, सस्कृति हमार सम्पति रहल बटैली । यूवाहुक्रे अब्बेक कर्णधार रहल कहटी ओइनके मजा ज्ञान, सीप सिखैलैले मजा स्थान पाई सेक्ना उहाँ बटैली । कला, संस्कृतिके रुपमे विकृति नइल्यना उहाँ आग्रह करली । उहाँ कहली, ‘थारु समुदायके टरटिहुवारमे छाँकी बुँदा चह्रैना चलन बा, उ पाछे ठोरचे पिना चलनफे रहठ, मने जाँर डारु हम्रहिन पिए लागल बा ।’

कैलारी गाउँपालिका वडा नम्बर ३ के वडा अध्यक्ष सन्तराम चौधरी थारु समुदायमे रहल परम्परागत कला, संस्कृति संरक्षणके सास्कृतिक कार्यक्रमके आयोजना कैना जरुरी रहल बटैलै । उहाँ कहलै, थारु समुदायके पुर्खाहुक्रे बहुट कला, संस्कृति, गीतबाँस, ज्ञान सीप सिखैलै, पहिले पुस्तान्तरण हुइटी आइल रहे । मने पुस्तामे ओटरा रुची नइडेखल हो । पुस्तान्तरण करे नइसेक्लेसे लोप हुइना अवस्थामे पुगी ।

कला, संस्कृति, परम्परागत ज्ञान सीप संरक्षण सम्वद्र्धन कैना यूवा काँधमे आइल नेपाली काँग्रेस कैलारी गाउँपालिका सभापति कृष्ण प्रसाद चौधरी बटैलै । उहाँ कहलै, अब्बे यूवा पिढी फेरसे अपन संरक्षण करेक लाग तयार हुइटी बटै । मने संस्कृति संरक्षण करेबेर औरे संस्कृति अपनैटी विकृति भर नाल्यन्बी ।

नेकपा माओवादी एकिकृत कैलारी गाउँपालिका अध्यक्ष बतासु चौधरी पश्चिमा संस्कृतिमे विकृति डेखल बटैलै । गाउँघरमे पहिले विना कार्यक्रमके सखिया, मुङग्रहवालगायत नाँच होए अब्बे स्टेज कार्यक्रममे सिमित हुइटी गैल उहाँ बटैलै ।

डिया डेवारी सांस्कृतिक कार्यक्रमके अवसरमे थारु समुदायके कला, संस्कृति सरक्षण सम्वद्र्धनके सहयोग पुगुइया सुपक थारु सलिमा पहुराके संचालक गोविन्द मुखिया, सिएस यूटुव च्यानलके संचालक सतिश सिन्ह, स्वर्गिय गायक पतिराम चौधरीके डाडु हरिराम चौधरीहे सम्मान कैगिल बा ।

बसौटीके मुङग्रहुवा नाँचसे स्वागत कैगिल कार्यक्रममे बेनौली गाउँके सखिया नाँच, के गाउँके लाठी नाँच, कठघोरी नाँच, भररीके झुम्रा नाँच, रानामुडाके सखिया नाँचलगायत थारु कलाकारहुकने परम्परागत ओ आधुनिक गीतबाँसमे प्रस्तुति डेखागिल रहे ।
राष्ट्रिय थारु कलाकार मञ्च सुदूरपश्चिम प्रदेश अध्यक्ष संगत थारुके घरगोस्यामे हुइल कार्यक्रममे स्वागत मन्तव्य कलाकार तथा नागरिक उन्मुक्ती पार्टीके केन्द्रीय सदस्य चन्द्र चौधरी चाँद करल रहिट । कार्यक्रमके संचालन राज चौधरी ओ सुनिता चौधरी ‘फकलपुरान बुदी’ करल रहिट । कार्यक्रममे कैलारी गाउँपालिका वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ वडा अध्यक्ष प्रेम बहादुर चौधरीफे पहुना रुपमे सहभागी रहिट ।