भूकम्प प्रभावितहे धनगढी उपमहानगरसे खाद्यान्न सहयोग

पहुरा समाचारदाता
धनगढी, २३ कात्तिक । जाजरकोट ओ रुकुमपश्चिमके भूकम्प प्रभावितके लाग धनगढी उपमहानगरपालिकासे बिफेक रोज खाद्यान्न सहयोग करले बा ।

कर्णाली प्रदेशके जाजरकोट ओ रुकुमपश्चिमके भूकम्पपीडितके लाग उपमहानगरसे ६ लाख ३५ हजार रुपियाँ बराबरके सय क्विन्टल चाउर पठाइल धनगढी उपमहानगरके नगरप्रमुख गोपाल हमाल जानकारी डेलै । उपप्रमुख कन्दकलाकुमारी रानाके नेतृत्वमे उपमहानगरके जनप्रतिनिधिके टोली राहत लेके बिफेक रोज कर्णाली प्रदेश गैल बा ।

उक्त सामग्री उपमहानगरके टोलीसे सुर्खेतमे कर्णाली प्रदेश सरकारहे हस्तान्तरण कैना नगर प्रमुख हमाल बटैलै । राहत लेके गैल टोलीहे नगरप्रमुख हमाल बिफेक रोज बिदाइ करल रहिट । उपमहानगरके बिफेक रोज बैठल २८ औँ कार्यपालिका बैठकसे कर्णाली प्रदेशके भूकम्प प्रभावितके लाग राहत सामग्री पठैना निर्णय करल रहे ।

बैठकसे भूकम्पसे ज्यान गुमाइलके निधनप्रति शोक प्रस्ताव पारित करले बा । उपमहानगरके विपत् व्यवस्थापन शाखा प्रमुख दीपक भण्डारी भूकम्प प्रभावितहे राहत वितरण कैना सरकारसे बनाइल एकद्वार प्रणालीमार्फत उक्त खाद्यान्न वितरणके लाग राहतसहित उपमहानगरके टोली पठाइल बटैलै ।