खुल्ला नृत्य प्रतियोगिता तथा बर्का भजहर सांस्कृतिक कार्यक्रम
दिनेश दहित
मसुरिया, १ अगहन । थारु संस्कृतिके प्रचारप्रसार, नया प्रतिभाके खोजी ओ पहिचानसंगे स्थानीयस्तरमे पर्यटनके विकास कर्ना उद्देश्यसे गौरीगंगा नगरपालिका वडा नम्बर १० मे अगहन १ गते शुकके रोज खुल्ला नृत्य प्रतियोगिता तथा बरका भजहर सांस्कृतिक कार्यक्रम सम्पन्न हुईल बा ।
नुक्लिपुर गाउँके भल्मन्सा हिंगुराम चौधरीके अध्यक्षतामे हुईल कार्यक्रमके बर्का पहुना सुदुर पश्चिम प्रज्ञा प्रतिष्ठानके उप कुलपति डा.टिएन जोशी रहल रहिट । कलेसे कार्यक्रमके खास पहुना गौरीगंगा नगरपालिका १० के वडा अध्यक्ष नरसिंह सार्की, पर्यटन विकास कार्यक्रमके प्रमुख काली चरण चौधरी, थारु कल्याणकारी सभा केन्द्रीय सदस्य रामचरण चौधरी, पृर्व गुरुवा प्रदेशी चौधरी रहल रहिट ।
कार्यक्रममे सामुदायिक समन्वय समितिके अध्यक्ष ओम प्रकाश सापकोटा, पूर्व वडा अध्यक्ष पदमबहादुर ऐर, वडा सदस्य तिलाराम चौधरी, पूर्व वडाध्यक्ष हरि तिवारी लगायतके शुभकामना मन्तव्य डेहल रहिट । ओस्तक कार्यक्रममे खुल्ला नृत्य प्रतियोगितामे प्रथम प्रेजिना चौधरी, दोसर स्थान रोनि ग्रुप लिक्मा ओ टिसरा स्थानमे विणु चौधरी हुईल रहित ।
पुरस्कारमे प्रथम हे रु. १५००० नगद दुसराहे रु ५००० नगद ओ टिसराहे नगद रु . २००० प्रदान कैगिल रहे । मुल्यांकन मे निर्देशक सुध राम दहित, आदर्श महत्तो, अनुप चन्द, अभिषेक चौधरी रहल रहित । कार्यक्रममे भजहर भगाके सक्कु पहुननहे भजहरमे सामुहिक खानाके सुरुवात हुईल रहे ।
नुक्लिपुर गाउ समाज, नुक्लिपुर टोल विकास समिति ओ नुक्लिपुर सामुदायिक होमस्टेमे संचालन हुईल रहे । कार्यक्रममे मोडेल वीर चौधरी, महालोक गायक मनि राम चौधरी, अस्मिता चौधरीके फेन विशेष प्रस्तुति रहल रहे ।
