द्वन्दपीडित एकल महिलाहे आर्थिक सशक्तीकरणके आवश्यता बाः गाउँपालिका अध्यक्ष
पहुरा समाचारदाता
हसुलिया, ५ अगहन । द्वन्दपीडित एकल महिलाहुकनहे आर्थिक सशक्तीकरणसे जोरना आवश्यक करल कैलारी गाउँपालिकाके अध्यक्ष राजसमझ चौधरी बटैलै बटै ।
विस्तृत शान्ति सम्झौता दिवसके अवसरमे मानव अधिकारका लागि महिला एकल महिला समुह सुदूरपश्चिम प्रदेशके आयोजना, कुर्वे विस्ट्रोके आर्थिक सहयोग, कैलारी गाउँपालिका, एडभोकेसी फोरम समन्यमे मंगरके रोज हसुलियामे हुइल द्वन्द प्रभावित सीमान्तकृत एकल महिला ओ नेपाल प्रहरीसे लैङिकतामे आधारित ंिहंसा सम्बन्धी ‘नागरिक संवाद कार्यक्रममे गाउँपालिका अध्यक्ष उ बाट बत्वाइल रहिट ।
शसस्त्र द्वन्दकालके बेला ढेर जानेक ज्यान गैल बा,’ गाउँपालिका अध्यक्ष कहलै, ‘द्वन्दकालमे कैलाली जिल्लामे सबसे ढेर कैलारीमे क्षति हुइल बा । विस्तृत शान्ति सम्झौता नइहुइट कलेसे अभिनसम कटरा जानेक ज्यान जाइट ।’ द्वन्द प्रभावित सीमान्तकृत एकल महिला पीडित दुःखी बटै । समाज झन ओइनहे दुखी बनैना काम करल उहाँ बटैलै ।
स्थानीय सरकार लग्गेक सरकार रहल ओरसे द्वन्द प्रभावित सीमान्तकृत एकल महिलाके सदैव सहयोग कैना तत्पर रहल अध्यक्ष बटैलै ।
गाउँपालिका उपाध्यक्ष भगवतीकुमारी चौधरी द्वन्द प्रभावित सीमान्तकृत एकल महिलाहुकनहे स्थानीय सरकारके हेर्ना दायित्य रहल बटैली । समाजहे आघे बह्रैना हो कलेसे द्वन्द प्रभावित सीमान्तकृत एकल महिलाहे आर्थिक रुपमे निर्भर बनैना जरुरी बा,’ गाउँपालिका उपाध्यक्ष कहली, द्वन्द प्रभावित सीमान्तकृत एकल महिलाहे आयमुलक, सीपमु्लक तालिमके आवश्यकता बा ।’ कैलारी गाउँपालिका एकल महिला संग्गे एकल पुरुषहे भत्ताहे व्यवस्था करल बटैली ।
कार्यक्रममे गाउँपालिकाके प्रमुख प्रशासकीय अधिकृत विर बहादुर ऐर, सामाजिक विकास अधिकृत यगम कलेल लगायत अपन बाट राखल रहिट । कार्यक्रममे विस्तृत शान्ति सम्झौताके बारे एडभोकेसी फोरमके संयोजक पुष्प विक्रम शाही जानकारी डेहल रहिट । कलेसे महिला अधिकारबारे कैलारी गाउँपालिकाके महिला तथा बालबालिका शाखा प्रमुख बालकुमारी चौधरी जानकारी डेहल रहिट ।
मानव अधिकारका लागि महिला एकल महिला समुह सुदूरपश्चिम प्रदेश सुमन शर्माके अध्यक्षतामे हुइल कार्यक्रमके संचालन कार्यक्रम संयोजक वेद अवस्थी करल रही । कार्यक्रममे वडा नम्बरके वडा अध्यक्ष धोजहरिपाल बोहरा, मानव अधिकारका लागि महिला एकल महिला समुहके सदस्य, द्वन्द प्रभावित सीमान्तकृत महिलाहुकनके सहभागिता रहे ।
