कृषक कार्ड विना कृषि हाट बजारमे व्यवसाय कैना रोक

पहुरा समाचारदाता
धनगढी, ५ अगहन । कृषक कार्ड विना कृषि हाट बजारमे व्यवसायके लाग रोक लगैले बा ।

बास्तविक किसान अपने उत्पादन करल उपज बिक्रि वितरण करे नैपाइल हुइट । हाल किसान अपने उत्पादन करल उपज बिचौलियाहे नइबेचके स्वच्छ ओ उचित दाममे उपभोक्ताहे विक्रि करे पैना कहिके उप–महानगरपालिकासे किसानहुकनहे कृषक कार्ड बनाके बिक्रि कैना वातावरण निर्माण करल बा । कुछ दिनसे लगातार हाट बजारमे कार्ड नइरहल किसानहुकनहे नगर प्रहरीसे कार्ड बनैना आग्रह करल रहे ।

धनगढी उप–महानगरपालिका वडा नं. १ मे स्थित त्रिनगर कृषि हाट बजार बिगतके समयमे थोक विक्रेताके मनोमानी ढंगसे संचालन हुइटी आइल गुनासोफे हुइटी आइल रहे । मंगरके सकारे कार्ड नइरहल साहिल खान ओ सारुख खानहे गेटमे चेक करेबेर हाट बजारभिटर जवरजस्ती जाके भिटर नगर प्रहरीसे कार्ड मागेबेर गालीगलौज करके मुक्तयनन्द महतो. अपनही टिना फेकल रहिट । उहाँ अपनथेन कृषक कार्ड नइरहल ओ रिसले अपनही अपन टिना फेकल स्विकार करले बटै ।

सकारे अपन टिना अपनही फेक्के नगर प्रहरीसंग झगडा करे आइल ओ होहल्ला करके और कृषकहुकनहे समेत व्यापार कैना असहज करल ओरसे नगर प्रहरीसे नेपाल प्रहरीके सहयोगमे उहे ठाउँसे ओइनहे नियन्त्रणमे लेहल रहे ।

धनगढी उपमहानगरपालिकाके नगर प्रमुख बास्तविक किसान मारमे नपरित कहिके कृषक कार्डके व्यवस्था करल बटैलै । उहाँ कहलै, ‘यहाँके उत्पादन हुइल टिनाहे यिहृ ठाउँमे खपट करेक लाग नगरपालिकासे कृषक कार्डके व्यवस्था करले बा ।‘ अब्बे धनगढी उप–महानगरपालिका वडा नं. १ मे स्थित त्रिनगर कृषि हाट बजार ओ चौराहामे टिना विक्री वितरण कैना व्यवस्था मिलाइल बा । कलेसे धनगढी–८ धनगढी गाउँमेफे हाली संचालन कैना नगर प्रमुख हमाल बटैलै । कृषक कार्ड बाहेक कुहीहेफे.हाट बजारमे व्यवसाय कैनामे प्रतिवन्ध लगाइल उहाँ बटैलै ।