धनगढीके सौन्दर्य बह्रैना कला, सस्कृति झल्कना वाल पेन्टिङ
पहुरा समाचाररदाता
धनगढी, ५ अगहन । धनगढी उपमहानरपालिकासे धनगढी सहरके सौन्दर्य बह्रैना सुदूरपश्चिम प्रदेशके टमान समुदायके कला, सस्कृति झल्कना वाल पेन्टिङ सुरु हुइल बा ।
हरियाली धनगढी अभियान आघे सारके सघन वृक्षारोपण करल धनगढी उपमहानगरपालिकासे वाल पेन्टिङ समेत सुरु करल हो ।
उपमहानगरपालिकासे सडक तथा सार्वजनिक स्थानमे वृक्षारोपण करले बा । धनगढीमे सडकके भित्तामे सुदूरपश्चिमके कला, संस्कृति, भेषभूषा ओ पर्यटकीय गन्तव्यके चित्र उतारे लागल बा । धनगढी रङशालाके पर्खालमे उपमहानगरसे भित्तिचित्र बनाई लागल हो ।
सुदूरपश्चिमके पर्यटकीय गन्तव्य, भेषभूषा, कला ओ संस्कृतिके प्रचारप्रसार कैना पेन्टिङ सुरु करल नगर प्रमुख गोपाल हमाल बटैलै । ‘हम्रे धनगढीहे सुन्दरफे बनाई परठ कना उद्देश्यसे एक ठो हम्रे वृक्षारोपण करली । आब वाल पेन्टिङ करके सुदूरपश्चिमहे चिन्हैबी,’ उहाँ कहलै, ‘सुदूरपश्चिमके कला, संस्कृति, भेषभूषा ओ सुदूरपश्चिमके पर्यटकीय गन्तव्यके जानकारी करैना पेन्टिङ करटी ।’
नगर प्रमुख हमाल पेन्टिङ करल भित्तामे पोस्टर नइटस्न, गुट्का खाके नइथुक्न आग्रह करले बटै । पेन्टिङसे सुदूरपश्चिमके बारेमे जानकारी लेना आगन्तुकहुकनके सहज हुइना तर्क उहाँक बा ।
