एमालेके संकल्प यात्रा बैतडीके झुलाघाटसे सुरु
पहुरा समाचारदाता
धनगढी, १४ अगहन । नेकपा एमालेके संकल्प यात्रा सुदूरपश्चिम प्रदेशके बैतडी जिल्लाके झुलाघाटसे सुरु हुइल बा ।
नेकपा एमालेक अध्यक्ष एवं पूर्व प्रधानमन्त्री केपी शर्मा ओली विफेक रोज नेपाल–भारतके सीमावर्ती बजार झुलाघाटसे नेपालके राष्ट्रिय झण्डोत्तोलन कैके यात्राके उदघाटन करल हुइट ।
पार्टी अध्यक्ष ओलीसँग वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, रामबहादुर थापा, महासचिव शंकर पोखरेलसहितके सक्कु पदाधिकारी ओ केन्द्रीयस्तरक अन्य नेता बुधके साँझ सदरमुकाम गोठलापानी गैल रहिट ।
नेकपा एमाले सुदूरपश्चिम अध्यक्ष कृष्णप्रसाद जैशीके अनुसार झुलाघाटसे सुरु हुइल संकल्प यात्रा मध्य पहाडी लोक मार्गमे तीन सातासम चल्ने बा । पुष्पलाल राजमार्ग नामकरण कैलक मध्य पहाडी राजमार्गके लम्बाइ करीब एक हजार ८७९ किलोमिटर रहल बा । पुस २ गते पाँचथरके चिवा झञ्ज्याङमे पुगके यात्रा समापन हुइना सुदूरपश्चिम अध्यक्ष जैशी जानकारी डेलै ।
यी यात्रासे मुलुकके समृद्धिके नयाँ पाटा पहिचान हुइना दाबी करल बा । सक्कु ठाउँके जनताहे भेट्न, राजमार्गसे पर्ना प्रभावके विषयमे जानकारी डेना ओ प्रेरित कैना, मौलिक उत्पादनके बजारीकरण कैना, जिल्लाके व्यापारिक ठाउँके सम्भावना रहल क्षेत्रमे विकास ओ समृद्धिबारे बहस कैना हुइल बा ।
यिहे बीच प्रत्येक जिल्लामे भारी सभाके आयोजना कैना ओ उहीसे जनताहे मध्य पहाडी राजमार्गके महत्व ओ सान्दर्भिकता दर्सैना बटाइल बा ।
