आठौं थारू साहित्य राष्ट्रिय सम्मेलन मोरङमे हुइना
थारू साहित्य राष्ट्रिय सम्मेलन सहयोगार्थ पुस्तक प्रदर्शनी सुरु
पहुरा समाचारदाता
धनगढी, १६ अगहन । आठौं थारू साहित्य राष्ट्रिय सम्मेलन अइना माघमे मोरङमे हुइना तय हुइल बा ।
थारु लेखक संघ, हौली परिवार तथा जंग्रार साहित्यिक बखेरीसे आठौं थारू साहित्य राष्ट्रिय सम्मेलनके आयोजना करटी बटै । यिहे क्रममे स्थानीय संयोजनकर्ता हौली परिवार मोरङके आयोजनामे अगहन १५ गते तयारी बैठक बैठल बा । जे आठौं थारु साहित्य राष्ट्रिय सम्मेलन अइना माघ २६ से २८ गतेसम मोरङके विराटनगर,गढी वा दुहबीमे कैना निर्णय करले बा ।
हौली परिवारके अध्यक्ष श्रवण सुतिहार स्थान तत्काल तय कैना बटैलै । तयारी बैठकमे थाकस, महिला सभा, विद्यार्थी सभा, युवा सभा, पत्रकार, समाजके प्रतिष्ठित ब्यक्ति तथा बुद्धिजीवीहुकनके सहभागिता रहल रहे ।
थारू साहित्य राष्ट्रिय सम्मेलन सहयोगार्थ पुस्तक प्रदर्शनी सुरु
उहोर, जंग्रार साहित्यिक बखेरीसे आठौं थारू साहित्य राष्ट्रिय सम्मेलन सहयोगार्थ सप्ताहब्यापी पुस्तक प्रदर्शनी सुरु सुरु करले बा । बर्दियाके कोठियाघाटमे आयोजना करल पुस्तक प्रदर्शनी अगहन १५ गतेसे २२ गतेसम सञ्चालन हुई ।
पुस्तक प्रदर्शनीमे खास करके थारु भाषा साहित्यके पुस्तकके साथे स्थानीय लेखकके अन्य भाषाके पुस्तकफे रहल लेखक शेखर दहित बट्रैलै । पुस्तक प्रदर्शनीके पहिल दिन करिब १ सय थान पुस्तक बिक्री करल जंग्रार साहित्यिक बखेरीके अध्यक्ष सोम डेमनडौरा बटैलै ।
ओस्टेक करके, बखेरीसे आठौं थारू साहित्य राष्ट्रिय सम्मेलन सहयोगार्थ एक कप चिया अभियान चलैले बा । यिहीसे १ लाख ढेर रकम संकलन हुसेकल अभियन्ता शेखर दहित जनैलै ।
स्मरण रहे दाङदेउखुरीसे सुरु हुइल थारू साहित्य राष्ट्रिय सम्मेलन कैलाली, बर्दिया, रुपन्देही, सुर्खेत, कञ्चनपुर, बाँकेमे करके सात श्रृंखला पार करसेकल बा । सातौं थारू साहित्य राष्ट्रिय सम्मेलन बाँकेके राप्तीसोनारी गाउँपालिकास्थित सिधन्वामे हुइल रहे ।
