मुख्यमन्त्री शाह ओ इजरायली राजदूतबिच भेटवार्ता
पहुरा समाचारदाता
धनगढी, १९ अगहन । सुदूरपश्चिम प्रदेशके मुख्यमन्त्री कमलबहादुर शाह ओ नेपालके लाग इजरायली राजदूत हनान गोडरबिच भेटवार्ता हुइल बा । भेटके क्रममे मुख्यमन्त्री शाह इजरायलमे हमास आक्रमणसे ज्यान गुमाइल नेपालके १० जाने विद्यार्थीके परिवारहे सान्त्वना स्वरुप राहत उपलब्ध कराइक लाग राजदूतहे आग्रह करल रहिट ।
मृतकके अभिभावकहे भेट कैना फेन मुख्यमन्त्री राजदूतहे आग्रह करल रहिट । लर्न एण्ड अर्न कार्यक्रम अन्तर्गत इजरायल पुगल सुदूरपश्चिम विश्वविद्यालयमे अध्ययनरत विद्यार्थीके डेढ महिना आघे हमास आक्रमणसे ज्यान गैल रहे ।
ओस्टके, हमाससे बन्दी बनाके लैगिल कञ्चनपुरके विपिन जोशीके अवस्था आभिन फेन अज्ञात रहल बा । हमाससे बेपत्ता बनाइल जोशीके तत्काल उद्धार ओ परिवारहे राहतके लाग फेन मुख्यमन्त्री राजदूतहे आग्रह करल रहिट ।
भेटके क्रममे मुख्यमन्त्री शाह सुदूरपश्चिम सरकारसे आगामी फागुन २३ ओ २४ गते प्रदेश लगानी तथा विकास सम्मेलन करे जैटी रहल राजदूत हनान गोडरहे जानकारी कराइल रहिट । लगानी तथा विकास सम्मेलनहे इजरायली सरकारके साथ, समर्थन रहना राजदूत प्रतिवद्धता जनाइल मुख्यमन्त्रीके निजी सचिवालय जानकारी डेहल बा ।
