सात दिने नेतृत्व विकास तथा उदघोषण तालिम सुरु
पहुुरा समाचारदाता
हसुलिया, २० अगहन । कैलारी गाउँपालिकाके आर्थिक सहयोगमे श्री पूर्णागिरी क्लब कैलारी –२, बसौटीके आयोजनामे बुधके रोजसे सात दिने नेतृत्व विकास तथा उदघोषण तालिम सुरु हुइल बा ।
कैलारी गाउँपालिका अध्यक्ष राजसमझ चौधरीके वडका पहुना हुइल कार्यक्रममे विशिष्ट पहुना थारु कल्याणकारिणी सभा क्षेत्र नम्बर ३ के क्षेत्रीय सभापति कृष्ण चौधरी रहल रहिट । उदघाटन कार्यक्रममे गाउँपालिका अध्यक्ष राजसमझ चौधरी यूवाहुकनके विकास संग्गे विकृति नियन्त्रणमे लागे पर्ना बटैले बटै । उहाँ कहलै, यूवा लागु औषध दुव्र्यशनीमे फस्टी गैल बटै । यिहीहे नियन्त्रण नइकरलेसे ढेर यूवाके भविष्य अन्धारमे जाई सेकी ।’
कार्यक्रममे विशिष्ट पहुना थारु कल्याणकारिणी सभा क्षेत्र नम्बर ३ के क्षेत्रीय सभापति कृष्ण चौधरी, वडा नम्बर ७ के वडा अध्यक्ष दिपेन्द्रबहादुर बम, धनिराम चौधरीलगायत मन्तव्य व्यक्त करल रहिट । उदघाटन कार्यक्रममे सक्कुके वडा अध्यक्ष, बसौटी गाउँ भल्मन्सा खुशीराम चौधरी, श्री शिव शंकर प्रा.वि.के प्रअ रामदशनी चौधरीलगायतके सहभागिता रहे ।
क्लवके अध्यक्ष जनक चौधरीके अध्यक्षतामे हुइल कार्यक्रमके संचालन सुरज चौधरी ओ स्वागत मन्तव्य क्लबके उपाध्यक्ष आरती चौधरी करल रहिट । सात दिने नेतृत्व विकास तथा उदघोषण तालिमके प्रशिक्षक विनिता चौधरी रहल बटी ।
