कठरिया थारु भाषा पाठयक्रम निर्माणके लाग छलफल

पहुरा समाचारदाता
धनगढी, ३० अगहन । आदिवासी जनजाती कठरियाथारु भाषा पाठयक्रम निर्मा।णके लाग कैलालीके सुखडमे चारदिने छलफल हुइल बा ।

कठरिया समाज नेपालके आयोजना तथा हिमाली आदिवासी समाज काठमाण्र्डौके आयोजनामे यिहे अगहन २७ से ३० गतेसम छलफल गोष्ठी हुइल हो । चार दिने कार्यशाला संचालन तथा सहजीकरणके लाग हिमाली आदिवासी समाजके प्रवन्धक छिङग चिप्पा ल्होमि ओ कार्यक्रम संयोजक टेसिडेमा भोटे अपनही सक्रियता साथ खटल रहिट ।

छलफल समापन कार्यक्रममे वडका पहुना घोडाघोडी नगरपालिकाके प्रमुख खडकबहादुर रावत अपने कठरिया समाज नेपालके मागप्रती सकारात्मक रहल ओ नगरपालिकासे हुई सेक्ना कौनोफे सहयोग कैना तयार रहल बटैलै । आदिवासी जनजाती कठरियाथारु भाषा दिन–दिने लोप हुइटी गैल ओरसे संरक्षण कैना आवश्यक रहल बटैलै । कठरियाथारु भाषा पढाई परवाहक पाठयक्रम लागु हुइलेसे भाषा कला, संस्कृतिके सरक्षणमे टेवा पुग्ना उहाँ बटैलै ।

हिमाली आदिवासी समाजके प्रवन्धक छिङग चिप्पा ल्होमि आदिवासी ओ छोट संख्यामे रहल समुदायसंगके सहकार्यमे अपने सदैव हर्षित रहना बटैली । उहाँ कठरिया समाजसे अपन अलग अस्तित्व स्थापित कैना करल मेहनतसे अपने बहुट प्रभावित बनल कहटी अइना दिनमेफे सहकार्यके लाग अपने तयार रहल बटैली ।

कार्यक्रममे पन्ध्र गाउँसे सहभागी कठरिया समुदायके प्रतिनिधिहुक्रे भाषा संरक्षण ओ पछिल्का पुस्ताहे अपन संस्कृतिके बारेमे जानकारी डेना भाषाके बारेमे प्रचार आवश्यक रहल बटैले बटै । कार्यशालामे सहभागी अर्जुन कठरिया ईतिहास झल्कैना कठरिया गित सुनैले रहिट कलेसे अन्य सहभागीफे अपन प्रस्तुती डेहल रहिट ।

कठरिया समाजके अध्यक्ष दुखिराम कठरियाके सभापतित्वमे हुइल समापन समारोहमे उहाँ कठरियाथारु भाषा पाठयक्रम निर्माणके लाग हुइल छलफलमे पहिल चरणमे स्टकहोल्डरहुकनसे सरसल्लाह, दुसरा चरणमे तथ्याङक संकलन ओ टिसरा चरणमे पाठयक्रम तयारीबारे छलफल हुइल बटैलै ।

यी समुदायके गझिन बस्ती रहल २० गाउँमे शिक्षा, जनसंख्याके अवस्थाबारे तथ्याङक संकलन कैगिलक अध्यक्ष बटैलै । कठरियाथारु बस्ती रहल विद्यालयमे कठरियाथारु भाषा पढाई परवाहके पाठयक्रम लागुके लाग पहल कैना अध्यक्ष कठरिया बटैलै ।

समाजके केन्द्रिय सदस्य राजकुमार कठरिया स्वागत मन्तव्य ओ कार्यक्रमके संचालन कठरिया समुदायके सक्रिय युवा तथा हिज नेपालके फिल्ड सुपरभाइजर टिआर कठरिया करल रहिट । कैलाली जिल्लाके जोशीपुर गाउँपालिका, कैलारी गाउँपालिका, जानकी गाउँपालिका, भजनी नगरपालिका, घोडाघोडी नगरपालिका ओ गौरीगंगा नगरपालिकामे कठरिया थारु समुदायके बस्ती रहल बा ।

कैलाली जिल्लाके स्थानीय तहमे अब्ब १७ जाने जनप्रतिनिधि रहल बाट जेम्न जोशीपुर गाउँपालिकाके उपाध्यक्षमे रेखा कठरिया ओ जानकी गाउँपालिकाके उपाध्यक्षमेफे लालमति कठरिया निर्वाचित हुइल रही । ओस्टेक करके करके पाँच जाने वडा अध्यक्ष ओ बाँकी कार्यपालिका सदस्य, वडा सदस्य रहल बटै ।