शैक्षिक गुणस्तरसंगे भौतिक सुधारमे ध्यान डेले बटीः गापा अध्यक्ष

पहुरा समाचारदाता
हसुलिया, ८ पुस । कैलाली जिल्लाके कैलारी गाउँपालिका वडा नम्बर ४ मे रहल कालिमाईं आधारभूत विद्यालयके वार्षिक साधारणसभा कार्यक्रम अँटवारके रोज सम्पन्न हुइल बा ।

कैलारी गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे उहाँ शैक्षिक गुणस्तरसंगे भौतिक सुधारमे लागल बटैले बटै । उहाँ कहलै, ‘ढेर जैसिन विद्यालयके भवन जिर्ण हुइल रहे । टिनके पाटासे छाईल पानी चुहनाहा भवनमे बालबालिका अध्ययनरत रहिट । एक बरसमे अधुरा भवन पुरा कैना, पुरान टिनके पाटा फेर्नासंग्गे शैक्षिक सुधारके लाग वडा अध्यक्षहुकनके संयोजकत्वमे अनुगमन समिति बनाके अनुगमनफे करल बटैलै ।

सामुदायिक विद्यालयके विद्यार्थी हेरैटी गैल ओरसे अभिभावकहुकनके मन जिटना आवश्यक रहलफे गाउँपालिका अध्यक्ष बटैलै । किसानहुकनके समस्या बुझटी मालपोतमे छुट, विमारीहुकनके चाहल निशुल्कके व्यवस्थाफे करल उहाँ बटैलै ।
संस्थागत विद्यालयमे फिस ढेर तिरे पर्ना मने सरकारी विद्यालयमे निशुल्क रहल कारण अभिभावक अपन लर्कनमे ढेर ध्यान नइडेहल बटैलै । गाउँपालिकाभिटरके २० ठो विद्यालयमे भन्साघर निर्माण करटी रहलफे उहाँ बटैलै ।

वडा नम्बर ४ वडा अध्यक्ष ठागुराम चौधरी विद्यालयमे पह्राई कैसिन बा, लर्का पहरठै की नाई कहिके अभिभावकफे अनुगमन करेपर्ना बटैलै । अभिभावकहुक्रे अपनमे खासे ध्यान नइडेहल कारण अभिभावक शिक्षा अनिवार्य रहल बटैलै ।

कार्यक्रममे वडा सदस्य हरिद्वारी चौधरी अभिभावकहुक्रे अपन लर्कन डगरेमसे छोरके चलजैना करल बटैटी । लर्कन विद्यालय पठाके केल नइहुई,’ उहाँ कहली, ‘लर्का विद्यालय पहरठै की नाई, कहाा जैठै, होमवर्क करठै की नाई कना बाटमे अभिभावक चासो लेना जरुरी रहल बटैली ।

कार्यक्रममे यूवा समाजसेवी रामसेवक चौधरी, भल्मन्सा सन्तराम चौधरी, समाजसेवी विन्तीराम चौधरी लगायत मन्तव्य व्यक्त करल रहिट । कार्यक्रममे विद्यालयके प्रअ दासीराम चौधरी आर्थिक बर्ष २०७९÷०८० सालके आयव्यय विवरण प्रस्तुत करल रहिट । कुल आम्दानी ४० लाख ७३ हजार ३४६ रुप्या ४० पैसा रहलमे खर्च ३५ लाख ४० हजार २५१ रुप्या हुइल बा कलेसे बचत ५ लाख ३३ हजार ९५ रुप्या ३५ पैसा रहल प्रअ बटैलै ।

कार्यक्रममे कैलारी गाउँपालिका वडा नम्बर ४ निवासी अर्जुन चौधरी अपने बाल्यकाल ओ विद्यार्थी जीवनसे ढेर समस्याके सामाना करल बटैटी पाँच जाने टुहरा असहायबालिकाहुकनहे विद्यालय पोशाक ओ शैक्षिक सामाग्री वितरण करल रहिट ।

कार्यक्रम विद्यालय व्यवस्थापन समिति अध्यक्ष भीखराम चौधरीके अध्यक्षतामे हुइल रहे । कार्यक्रममे स्वागत मन्तव्य शिक्षिका मायारानी चौधरी ओ संचालन शिक्षक टेकेन्द्र परियार करल रहिट । वार्षिक साधारणसभा कार्यक्रममे विद्यार्थीनहे थारु सांस्कृतिक नाँचफे डेखागिल रहे ।