बैजपुर गाउँके भल्मन्सामे ओमप्रकाश

पहुरा समाचारदाता
हसुलिया, ६ माघ । कैलाली जिल्लाके कैलारी गाउँपालिका वडा नम्बर ५ बैजपुर गाउँक भल्मन्सामे ओमप्रकाश बौखाही निर्वाचित हुइल बटै ।

शनिच्चरके रोज हुइल भुरा खेलमे भल्मन्साके लाग दुई जानेक उम्मेदवारी परलपाछे मतदान हुके ओम प्रकाश बौखही भल्मन्सामे निर्वाचित हुइल हुइट । कलेसे अधारीमे कालीचरण चौधरी ओ सचिवमे रामकुमार चौधरी चयन हुइल बटै ।
एक घर एक भोट नियममे जम्मा घरधुरी ११८ रहलमे १०७ मत परल रहे ।

जेम्ने चुनाव समितिके डेहल चुनाव चिन्हाँ स्याउ ओ मच्छी बिच मतके प्रतिस्पर्धामे मच्छी चिन्हाँमे ७५ मत ओ स्याउ चिन्हाँमे ३२ मत परल रहे । मच्छी चिन्हाँमे ओम प्रकाश बौखही(अटल)भारी मतसे फेनसे बैजपुरके भलमन्सामे निर्वाचित हुइलै । स्याउ चिन्हाँ विराजु चौधरी (शक्ति) रहल रहिट ।