स्वच्छ वातावरण निर्माण सम्बन्धी अन्तरक्रिया कार्यक्रम
पहुरन समाचारदाता
कञ्चनपुर, २० माघ । कञ्चनपुर जिल्लाके लालझाडी गाउँपालिकामे स्वच्छ वातावरण निर्माणमे सरोकारवालाके भूमिका विषयक अन्तरक्रिया कार्यक्रम लालझाँडीमे हुइल बा ।
लालझाँडी गाउँपालिका स्तरीय मानवअधिकार समुहसे अनौपचारिक क्षेत्र सेवा केन्द्र (इन्सेक) सुदुरपश्चिम प्रदेश कार्यालय धनगढी ओ लालझाँडी गाउँपालिकाके सहयोगमे अन्तरक्रिया कार्यक्रम आयोजना करल रहे ।
इन्सेक प्रदेश संयोजक खडकराज जोशी राष्ट्रिय वातावरण नीति २०७६ प्रस्तुत करटी नीतिके कार्यान्वयनके अवस्थाके बारेमे सहजीकरण करटी वातावरण संरक्षणके लाग सक्कु सरोकारवालासे आ अपन ओरसे सहयोग ओ समन्वय करे पर्ना बटैलै ।
कार्यक्रममे मानवअधिकार समुह लालझाँडीके अध्यक्ष सोमनाथ राना लालझाँडी गाउँपालिकामे रहल टमान ईटा उद्योगसे उत्सर्जन हुइना फोहोर मैलासे वातावरणमे नकरात्मक प्रभाव परटी रहल ओरसे ओ ध्वनी प्रदुषण हुइटी रहलप्रति सरोकारवालाके ध्यान आकर्षण करैलै । उहाँ प्रत्येक नागरिकके घरसे निकरना फोहोरहे सरना ओ नइसरना फोहोरहे छुट्याके व्यवस्थापन करे सेक्लेसे केल वातावरणहे स्वच्छ बनैना कुछ हदसम सहयोग हुइना कहटी, आबके बडल्टी परिवेशमे नागरिकहुक्रे अधिकारसंगसंगे नागरिक कर्तव्यफे पालना कैना आग्रह करलै ।
उहाँ तरकारीमे प्रयोग हुइटी रहल बिषादी तथा अन्नवाली भण्डारण करेबेर प्रयोग कैना विषादीसे दैनिक रुपमे उपभोक्ताहुक्रे मन्द बिष सेवन करटी रहल बाट उल्लेख करटी, नेपालके खेतीयोग्य जमिनमे अस्टे करके रसायनिक मलके प्रयोग हुइटी जैना हो कलेसे अइना १५ वर्षमे नेपाली माटीसे कौनोफे उत्पादन नइडेना विचार रख्लै ।
लालझाँडी गाउँपालिकाके २ नं. वडा कार्यालयके वडाअध्यक्ष आशाराम राना गाउँपालिकामे हालसमफे विपद व्यवस्थापन शाखा स्थापना नइहुइल ओरसे अपने सम्पादन करे पर्ना काम प्रभावकारी हुई नइसेकल बाट स्वीकार करटी, वातावरण संरक्षणके लाग गाउँपालिकासे वातावरण संरक्षण नीति निर्माण करके कार्यपालिकामे पेश करसेकल ओरसे कुछ दिन भिटरे नीति पास करके राजपत्रमे प्रकाशन कैना तयारी रहल जानकारी डेलै ।
लालझाँडी गाउँपालिकामे घरनक्सा पास करके घर निर्माण करुइयाके संख्या एकदम न्यून रहल ओरसे के केहोर घर बनैटी बा गाउँपालिकासे अनुगमन कैना समस्या हुइटी बटैलै । सरोकारवालासे कहल प्रत्येक नागरिक हुई पर्नामे वडाअध्यक्ष तथा जनप्रतिनीधिहे केल ठेक्का डेहल जस्टे मनसाय आम नागरिकमे हुइना दुभाग्य पुर्ण रहल बटैलै ।
स्थानीय मेडिकल व्यवसाय जनकराज चौधरी लालझाँडी गाउँपालिका खुल्ला दिशा मुक्त क्षेत्र घोषणा करल हुइलेसेफे प्रत्येक घरमे निर्माण करल शौचालय मध्ये अधिकांस प्रयोग विहिन रहल पाइल ओरसे गाउँपालिकासे अनुगमन करे पर्ना विचार रख्लै ।
श्री भानु माविके प्रधानाध्यापक वेदप्रसाद उपाध्याय सामुदायिक विद्यालयमे अध्ययनरत बालबालिकाके अभिभावक अपन लर्कनके रहनसहन तथा पठन पाठक क्रियाकलापप्रति बेखवर हुइना करलप्रति दुखेसो प्रकट करटी अभिभावक शिक्षाके आवश्यकता औल्यइलै ।
लालझाडी गाउँपालिका स्तरीय मानवअधिकार समुहके संयोजक सोमनाथ रानाके अध्यक्षता ओ वार्ड नं. २ के वडा अध्यक्ष आशाराम रानाके वरका पहुनामे हुइल कार्यक्रमके संचालन तथा सहजीकरण इन्सेक कञ्चनपुरके सहजकर्ता कैलाश पनेरु करल रहिट ।
