भावि पुस्ताके लाग संस्कृति बचाईः गाउँपालिका अध्यक्ष
पहुरा समाचारदाता
हसुलिया, २६ माघ । कैलारी गाउँपालिका वडा नम्बर ९ के आयोजनामे सामरचौरामे माघ मिलन कार्यक्रम कैगिल बा ।
गाउँपालिका अध्यक्ष राजसमझ चौधरीके वरका पहुनामे हुइल कार्यक्रममे उहाँ अब्बे परम्परागत संस्कृति डाइभर्ट हुइटी रहल ओरसे भावि पुस्ताके लाग हुइलेसेफे बचैना आग्रह करलै । उहाँ कहलै, ‘पुर्खनके ज्ञान ओइने वितलसंग्गे माटीमे मिलजाइटा । ओइनके ज्ञानसीप हस्तान्तरण लौव पुस्तामे सरे नइसेक्ठो । गुरुवा बैडवामे तन्त्रमन्त्र जडिबुटीके ज्ञान लौवा पुस्ता लेहे नइसेक्ठो ।
हमार भाषा हेराइटा । भर्खरके पुस्ता अपन मातृ भाषा छोरटै । ओइने अस्टे विस्रैटी गिलेसे ठेट थारु भाषा शब्दकोषमे खोजे पर्ना अवस्था आइसेक्ना गाउँपालिका अध्यक्ष बटैलै ।
ओस्टेक करके उहाँ गाउँ ठाउँके विकास करेक लाग सक्कु दल एकजुट आवश्यक रहल बटैलै ।
कार्यक्रममे विशिष्ट पहुना कैलारी गाउँपालिका अध्यक्ष कृष्ण प्रसाद चौधरी लोप हुइटी रहल गीतबाँस संरक्षण करटी दस्तावेजीकरण कैना जरुरी रहल बटैलै । उहाँ कहलै, ‘हमार पुर्खा अपन मनोरन्जनके लाग समय अनुसार गीतबाँस बनैले बटै । मने अब्बेक पुस्ता ओइनके सिखाइल रिति संस्कृतिसेफे आधुनिकता ओर ढेर ध्यान डेहल बटैलै । ओस्टेक करके विकास करेक लाग एक जाने चाहलेसे केल नइहुइना ओरसे सक्कु जानेक एकमत हुइना जरुरी बटैलै ।
माघ मिलन कार्यक्रमके संयोजक गरिबदास चौधरी सामरचौरामे डगरघाट, पुल पुलेसाके आवश्यकता परल ओरसे तीनु तहके सरकारके ध्यान जाई पर्ना बटैलै ।
कार्यक्रममे वडा सदस्य कृष्णी परियार वडा नम्बर ९ मे टमान समुदायके बसोबास रहल ओरसे माघ मिलन कार्यक्रममे सक्कु समुदाय अपन रिति संस्कृति डेखैना मौका पाइल बटैली ।
वडा नम्बर ९ के वडा अध्यक्ष खेमराज चौधरीके अध्यक्षतामे हुइल कार्यक्रममे स्वागत मन्तव्य केसरसिंह देउवा ओ संचालन हरिराम चौधरी करल रहिट । माघ मिलन कार्यक्रममे थारु समुदाय टमान मेरिक नाँच, मगर समुदायके अपन प्रस्तुती ओ डेउडा गीतफे डेखागिल रहे । ओस्टेक थारु समुदायके महालोक गायक मनिराम करिया मघरियाके वेजोड प्रस्तुती रहे ।
