प्रदेश सरकारसे एक वर्षे कार्यप्रगति सार्वजनिक

पहुरा समाचारदाता
धनगढी, २८ माघ । सुदूरपश्चिम प्रदेश सरकारसे एक बरसके कार्य प्रगति सार्वजनिक करले बा । शनिच्चरके रोज धनगढीमे एक कार्यक्रमके विच मुख्यमन्त्री कमलबहादुर शाह एक बरसके प्रगति सार्वजनिक करल हुइट ।

सुदूरपश्चिम प्रदेशके भौतिक पूर्वाधार विकास मन्त्रालयसे एक वर्षमे करिब ९२ करोड राजस्व असुली करले बा । मन्त्रालयसे पूर्वाधार विकासमे विल्गैना करके प्रगति हुइल दाबी समेत करले बा । सडक, सडकपुल, खानेपानी तथा सरसफाइ, उर्जा जलस्रोत तथा नदी नियन्त्रणमे काम हुइल प्रदेश सरकारसे एक वर्षे कार्यप्रगति विवरणमे उल्लेख बा । ओस्टेक करके सहरी विकास तथा भवन निर्माण ओ यातायात व्यवस्था क्षेत्रके सुधारके लाग नीतिगत काम हुइल समेत मन्त्रालयसे दाबी करले बा । भौतिक पूर्वाधार विकास मन्त्रालयसे प्रदेश सरकार गठन हुइल एक वर्षमे ९१ करोड ६१ लाख राजश्व संकलन करल प्रगति विवरणमे उल्लेख बा ।

आर्थिक वर्ष २०७९/८० के कार्यक्रममे रहल पाँच हजार ३२९ आयोजनाके संख्या कटौती करके आर्थिक वर्ष २०८०/८१ के कार्यक्रममे एक हजार ९६१ आयोजना आघे बहैना करके बजेट विनियोजन करल भौतिक पूर्वाधार विकासमन्त्री प्रकाशबहादुर देउवा बटैलै । उहाँक अनुसार एक हजार ७५० क्रमागत ओ २१० आयोजना केल नयाँ हुइट । सरकारसे सम्भाव्यता अध्ययन हुइल आयोजनामे केल नयाँ योजनाके रुपमे आघे बढैना नीति डेहल मुख्यमन्त्री कमलबहादुर शाह बटैलै ।

मन्त्रालयसे १२२ दशमलव ९७ किलोमिटर माटे सडक, ग्राभेल सडक १८५ दशमलव ९० किलोमिटर ओ कालोपत्र सडक १०८ दशमलव १९ किलोमीटर निर्माण हुइल जनैले बा । ओस्टेक करके ९ ठो सडकपुल निर्माण हुइल ओ ५२० इन्टेक निर्माण हुइल मन्त्रालय जनैले बा । उ मन्त्रालयसे ५६३ ठो पानी पोखरी, २ हजार ५०५ किलोमिटर पाइपलाइन जडान ओ ८२ हजार ७०२ जनहनहे आधारभूतस्तरके खानेपानी सेवा तथा १८ हजार ६ सय जनहनहे मध्यमस्तरके खानेपानी सेवा विस्तार हुइल बा ।

मन्त्रालयसे २०७ ठो नहरके निर्माण हुइल, ५२ दशमलव २१ किलोमिटर तटबन्ध निर्माण हुके ७ हजार ३४५ हेक्टर क्षेत्रमे सिँचाइ सुविधा पुगल, २ ठो सौर्य उर्जाके निर्माण करल मन्त्रालय जनैले बा । भौतिक पूर्वाधार विकास मन्त्रालयसे ४४ ठो जनता आवास योजना, ४ ठो एकीकृत नमुना बस्ती निर्माण हुइल जनैले बा । मन्त्रालयसे सहरी तथा भवन निर्माणओरके ३२ ठो योजना सम्पन्न हुइल जनैले बा । यातायात व्यवस्थाओर ७ हजार ६३९ दुई प्रङगे्र सवारी दर्ता, ८९७ तीन पाङग्रे सवारी तथा ७२७ चार पाङग्रे सवारी दर्ता हुइल सार्वजनिक प्रगति विवरणमे उल्लेख बा । साथै एक वर्षमे मन्त्रालयसे २० हजार ९५ चालक अनुमति पत्र वितरण करले बा । यातायात व्यवस्था कार्यालयके काम सहज हुइना करके सेवा सुधारके काम हुइटी रहल भौतिक पूर्वाधार विकास मन्त्री देउवाके कहाई बा ।

भौतिक पूर्वाधार विकास मन्त्रालयसे त्रिनगर भन्सार कार्यालय, कैलाली ओ कञ्चनपुर भन्सार कार्यालय गडडाचौकीमे भारत तथा टिसरा मुलुकसे अइना सवारी साधनके अस्थायी अनुमति वितरण कार्यहे प्रभावकारी बनैना आवश्यक नीतिगत व्यवस्था करे लागल जनैले बा ।

नीतिगत सुधारके कार्यमे विद्यमान ऐनमे समसामयिक सुधार करके प्रदेश निजामती सेवाहे व्यवस्थित कैना प्रदेश निजामती सेवा ऐन २०७९ हे संशोधन कैना विधेयक प्रदेश सभामे पेश हुइल जनागिल बा । स्थानीय सेवा सञ्चालन सम्बन्धी विधेयकके प्रारम्भिक मस्यौदा तयार हुके प्रदेश लोक सेवा आयोगके रायके लाग पठाइलमे राय प्राप्ति पश्चात लगत्तै प्रदेश सभामे पेश कैना तयारी करल बा ।

प्रदेश सरकारसे प्रवाह हुइना सेवा ओ शासकीय प्रवन्धमे आवश्यक पर्ना नीतिगत तथा कानूनी व्यवस्थाके लाग मन्त्रिपरिषदसे यी अवधिमे ५ ठो संशोधन विधेयक प्रदेश सभामे पेश हुइल बा । २ ठो विधेयक तर्जुमाके लाग सैद्धान्तिक सहमति प्रदान करल बा । उहे अवधिमे २ ठो नियमावली ८ ठो कार्यविधि ओ ३ ठो मापदण्ड निर्माण हुइल बा । एकीकृत छात्रवृत्ति निर्देशिका संशोधन करल बा ।

गत आर्थिक वर्षमे स्थानीय तहमे रु. १ अर्व ४७ करोड ८४ लाख ५१ हजार वित्तीय हस्तान्तरण हुइल मे चालू आर्थिक वर्ष २०८० ८१ मे झण्डै रु. ८७ करोड वृद्धि हुके रु. २ अर्व ३४ करोड ७५ लाख ७० हजार (कुल बजेटके ८ दशमलव २५ प्रतिशत) हस्तान्तरण करल बा । यिहीसे स्थानीय तह ओ प्रदेश सरकार बीचके आर्थिक सम्बन्ध प्रगाढ हुइटी गैल मुख्यमन्त्री शाह बटैलै । ओस्टेक समानीकरण ओ विशेष अनुदानमे २५ लाख ओ ५० लाख रुपैयाँके न्युनतम सिमा निर्धारण करके कार्यान्वयन करल बा ।

प्रदेश स्वरोजगार विकास कोष मार्फत ५० ठो सहकारीहे २४ करोड ८९ लाख रुप्या ऋण प्रवाह करके १ हजार २८७ जनहनहे स्वरोजगारी प्रदान करल बा ।

प्रधानमन्त्री कृषि आधुनिकिकरण परियोजना ओ मुख्यमन्त्री एकीकृत कृषि तथा पशुपन्छी विकास कार्यक्रम अन्तरगत ब्लक विकास कार्यक्रम ओ नमुना गाउँ कार्यक्रम मार्फत कृषि तथा पशुपन्छी क्षेत्रमे टमानज कृयाकलाप सञ्चालन हुके उत्पादन, उत्पादकत्व वृद्धि हुइल बा ।

साना सिँचाइ, कोल्ड च्याम्बर ओ कृषि उपज संकलन केन्द्र लगायतके कृषि पूर्वाधार निर्माणके क्षेत्रमे लगानी बढाके कृषिजन्य उत्पादनके उत्पादकत्व वृद्धि, संकलन, भण्डारण ओ बजारीकरणमे सहयोग हुइल बा ।

कृषि अनुदान प्रणालीहे व्यवस्थित कैना कार्यविधि निर्माण करके उहे अनुरुप अनुदान वितरण कार्यहे आघे बढाइल बा । व्यवसायिक कृषि प्रवद्र्धनके लाग सून्य व्याजदर (साँवा रकम फिर्ता हुइना नीति, अवलम्बन कैना कार्यविधि निर्माण अन्तिम चरणमे रहल बा । कृषि ओ पशुपन्छीमे लग्ना रोग निवारण करके सम्भावित क्षतिसे बच्न उपचारात्मक ओ निरोधात्मक कार्यक्रम, माटी परीक्षण कार्य सञ्चालन करल बा । आकस्मिक रुपमे डेखा परल लम्पी स्किन रोगहे नियन्त्रण करल बा ।
मल तथा बीऊविजन वितरणहे सहजीकरण करटी उन्नत बीउ उत्पादनके कार्यक्रमहे प्राथमिकतामे धारल बा । उत्कृष्ट कृषक सम्मान कार्यक्रम सञ्चालन करल बा ।

सडक, पुल, खानेपानी, शहरी विकास, भवन निर्माण जैसिन पूर्वाधार निर्माणके क्षेत्रमे टमान नयाँ ओ परिवर्तनकारी आयोजना निर्माण कार्यके थालनी हुइल बा । स्थानीय तहके पालिका केन्द्रहे मुख्य राजमार्गसंग जोरना सडक बाहै महिना सञ्चालन हुइना करके स्तरोन्नती कैना कार्य आघे बह्राइल बा । प्रदेश प्रमुख एकीकृत बस्ती विकास कार्यक्रम अन्तरगत डडेलधुरा ओ बाजुरा जिल्लामे वस्ती विकास कार्यक्रम सुरु करल बा ।

विद्युतीय चार्जिङ स्टेशन सहितके रिफ्रेस्मेन्ट सेन्टरके सम्भाव्यता अध्ययन, कर्णाली तथा महाकाली नदीमे जल यातायात जल मनोरञ्जन कार्यके सम्भाव्यता अध्ययन, धनगढीके मुख्य चौराहामे अत्याधुनिक क्यामरासहितके ट्राफिक सुरक्षा सम्बन्धी कार्यके शुरुवात करल बा ।

धनगढी उप महानगरपालिकाके मुख्यवजार क्षेत्रमे रहल कैलाली पुलसे हुलाकी सडक जिरो किलोमिटरसमके सडक निर्माण कार्य आघे बढाइल बा । धनगढीहे आधुनिक ओ व्यवस्थित सहर निर्माण कैना कार्य आघे बढाइल ओ क्रमशः और ८ ठो जिल्लाके प्रमुख सहरमे समेत कार्यान्वयन करटी लैजैना बा ।

कैलाली ओ कमनपुर जिल्लामे सिकलसेल एनिमिया ओ थालेसिमीया स्क्रीनिङ क्याम्प सञ्चालन करल बा । “मुक्त कमैया, हलिया तथा कमलरी पुनःस्थापना कार्यबिधी, २०८०“ निर्माणके लाग सम्बन्धित मन्त्रालयमे रायके लाग पठाइल बा । सुदूरपश्चिम स्तरीय बडघर, भल्मन्सा प्रथा संरक्षण सम्वर्द्धन ऐन मस्यौदा २०८० निर्माण समिति गठन करके काम आघे बढाइल बा ।