मालिका माध्यमिक विद्यालयके ६१ औं वार्षिकोत्सव
पहुरा समाचारदाता
चौमाला, ९ फागुन । गौरीगंगा नगरपालिका नगरपालिकाके चौमालामे रहल मालिका माध्यमिक विद्यालयके ६१औं वार्षिकोत्सव तथा अभिभावक दिवस सम्पन्न हुइल बा ।
मंगरके स्कुलव्यवस्थापन समितिके अध्यक्ष प्रेमराज भट्टके घरगोसियाइमे तथा सुदुरपश्चिम प्रदेशके प्रदेश प्रमुख देवराज जोशीके बर्का पहुनाइमे कार्यक्रम सम्पन्न हुइल हो ।
कार्यक्रमहे सम्बोधन कैटी प्रदेश प्रमुख जोशी विद्यार्थीहे असल बनाइक लाग अभिभावकके भूमिका महत्वपुर्ण रहना बटाइल रहिट । विद्यालयसे कितावी ज्ञान किल प्रदान कैनासे फेन व्यवहारिक ज्ञानहे प्राथमिकतामे राखे पर्ना बटाइल रहिट ।
कार्यक्रममे गौरीगंगा नगरपालिकाके नगर प्रमुख देवी कडेल,उपप्रमुख भोज बहादुर बम,प्रमुख प्रसासकिय अधिकृत धर्मराज बिनाडी,नगर प्रबक्ता तथा वडा नम्बर ५ के अअध्यक्ष बिष्णु भाट, वडा नम्बर २ के अध्यक्ष जनक साउद,वडा नम्बर ६ के वडा अध्यक्ष टेक कुँवर लगायत मनतब्य राखल रहिट ।
कार्यक्रममे टमान साँकृतिक कार्यक्रम फेन प्रस्तुत करल रहे । कलेसे वार्षिकोत्सवके अवसरमे आयोजित टमान मेरिक प्रतियोगितामे सहभागी विद्यार्थी, विद्यालयके पूर्व ओ उत्कृष्ट विद्यार्थीहे पुरुस्कृत तथा सम्मान करल रहे ।
कक्षा १२ सम पठनपाठन हुइटी आइल विद्यालयमे १३ सयसे ढेर विद्यार्थी अध्ययनरत रहल बाटै । विद्यालयके प्रधानाध्यापक रतन जैशी कार्यक्रममे स्वागत मनतब्य राखल रहिट ।
