संवैधानिक निकाय सरकारके बाधकः सभामुख भण्डारी
पहुरा समाचारदाता
धनगढी, ९ फागुन । संवैधानिक निकायके निर्णयके कारण सरकारहे काम कैना समस्या होके विकासगति लेहे नैसेकल सुदूरपश्चिम प्रदेशके सभामुख भीमबहादुर भण्डारी बटैले बाटै ।
६३औं वार्षिकोत्सवके अवसरमे राष्ट्रिय समाचार समिति सुदूरपश्चिम प्रदेश कार्यालयके आयोजनामे मंगरके धनगढीमे आयोजित ‘सुशासन ओ समृद्धिके लाग रासस’ विषयक अन्तरक्रियामे बोल्टी सभामुख भण्डारी संवैधानिक निकायसे विकल्प नैडेके सरकारसे करे लागल काममे बाँधा डेहल बटाइल हुइट ।
‘अदालतमे मुद्दा परठ् स्टे अर्डर आइठ् । अख्तियार छानविन आघे बह्राइबर काम प्रभावित हुइठ् । सरकारसे करल हरेक निर्णयमे पर्ना उजुरीमे अदालसे निकास नैडेके काम कैना रोकठ्’ उहाँ कहलै–‘अदालतसे जौन ठाउँमे समस्या हो ।ओम्ने प्रष्ट कहेपरल । खाली स्टे अर्डर जारी कैके सरकारहे काम कैनासे रोके नैपरल । निकास सहितके फैसला अदालतसे डेहे परल ।’
उहाँ अब्बे नेतासे आम नागरिक आपनजिम्मेवारीसे पन्छना काम हुइटी रहल बटैटी कहलै–‘जिम्मेवारीस डुर होके कौनो फेन समस्याके समाधान हुइ नैसेकी ।’
सभामुख भण्डारी देश संघियतामे जासेकल रलेसे फेन सरकारके प्रशासनिक निकाय आभिन पूर्ण रुपमे संघियतामे जाइ नैसेकल बटैलै । उहाँ कहलै–‘संघियताहे बलगर बनाइक लाग हम्रे जनताप्रति उत्तरदायी हुइ परल ।’
उद्योग, पर्यटन, वन तथा वातावरण मन्त्री रमेश धामी सरकारप्रति किल नैहोके सक्कु क्षेत्रमे विश्वास कायम हुइ नैसेकल बटाइल रहिट । उहाँ कहलै–‘अब्बे कुहीसे कुहीहे फेन विश्वास नैकरठै । मजा अपने किल रहल कना प्रचलन बह्रटी गैल बा । यकर कारण अब्बेव्यवस्थाउपर नै बरवार समस्या सृजना हुइल बा ।’ उहाँ अब्बे समाज उल्टा डगरा ओर लागल बटैटी कहलै–‘बहस ओ छलफल नैहुइलेसे आउर बरवार संकट पैदा हुइ । अब्बेक कुछ विचौलिया ओ शक्तिके आडमे स्वार्थ केन्द्रित निर्णय फेन हुइल पाजाइठ् । स्वार्थ लेके लागल मनै कबुकाल नेतृत्वहे नै परिचालन करठै ।’
प्रदेश सभा सदस्य तथा नेपाली काँग्रेस नेता प्रकाश बम एकपक्षिय ढंगसे समाचार सम्प्रेषण हुइबर सञ्चार जगतप्रतिके विश्वसनियता कमजोर हुइटी गैल बटैलै । उहाँकहलै–‘सत्यतथ्यओ विश्वसनिय समाचार आजके आवश्यकता रहल बा । यम्नेआम सञ्चारकर्मीहुक्रे ध्यान डेना जरुरी रहल बा ।’
कैलाली प्रमुख जिल्ला अधिकारी धमेन्द्र कुमार मिश्रसञ्चार क्षेत्रके खबरदारीसे सुशासन कायम करे सेक्ना बटैलै । उहाँ कहलै–‘सुशासनसे नै राष्ट्रके समृद्धि सम्भव रहल बा । यकर लाग सञ्चार जगत खबरदारीके भुमिका जिम्मेवारीपूर्ण ढंगसे निर्वाह करे परल ।’
उहाँ अब्बेक भीडके माध्यमसे फैसला हुइना गलत प्रवृतिके अन्त्यके लाग पत्रकारआउर जिम्मेवार होके आघे बह्रना जरुरी रहल बटैलै ।
नेपाल पत्रकार महासंघ केन्द्रिय सदस्य भरत शाह सञ्चार क्षेत्रके लाग नीति, नियम बनल रलेसे फेन ओकर पालना नैहोके समस्या बह्रटी गैल बटैलै । उहाँ कहलै–‘कुछ सञ्चारकर्मीके कारण आम व्यवसायिक पत्रकारिता करुइया मनै आक्षेप खेपे पर्र्ना अवस्था रहल बा ।’
रासस प्रदेश प्रमुख सिद्धराज भट्टके अध्यक्षतामे हुइल कार्यक्रममे नेपाल पत्रकार महासंघ कैलाली अध्यक्ष हिमाल जोशी, सुरक्षा निकायका प्रमुख, मन्त्रालयके प्रतिनिधि, सञ्चारकर्मी लगायतके सहभागिता रहल रहे ।
राससके संवाददाता सुरेन्द्र ताम्राकारसे स्वागत करल कार्यक्रमके सञ्चालन इन्दु केसी करल रही ।
