संसदीय प्रक्रिया अनुसार आघे बह्रना सभामुखहे आग्रह
पहुरा समाचारदाता
धनगढी, २८ चैत । सुदूरपश्चिम प्रदेशमे नेपाली कांग्रेस ओ नागरिक उन्मुक्ति पार्टी (नाउपा) के रेशम पक्ष मंगरके रोज संसदीय प्रक्रिया अनुसार आघे बह्रेना प्रदेश सभाके सभामुख भीमबहादुर भण्डारीके ध्यानाकर्षण करैले बटंै ।
उन्मुक्ति कारबाही करल समानुपातिक प्रदेश सभा सदस्य इन्दिरा गिरीके कारबाही सभामुख भीमबहादुर भण्डारीसे सदर करलपाछे सामुहिक रुपमे सभामुखके ध्यानाकर्षण कराइल नेपाली कांग्रेसके प्रमुख सचेतक विक्रम धामी बटैलंै ।
उहाँ इ मेरके क्रियाकलापसे प्रदेशके, संघीयता कमजोर टे हुइ नै अनाश्यक रुपमे प्रदेश सभा सदस्यहे कारबाही कैना रोग औरे पार्टीमे फेन सरजाइ कहल रहिट । ह्विप उल्लंघन करल संसदीय दलके सिफारिसमे कारबाही हुइपर्नामे बिना कारण विधि मिचके पार्टीके अध्यक्ष कारबाही कैना विधि सम्मत नैहुइल उहाँके दावी रहे ।
संसदीय प्रणाली अनुसार प्रदेश सभा सदस्यहे संसदीय दलसे किल कारबाही करे पैना रलेसे फेन सभामुख भण्डारी पार्टीके सिफारिसके आधारमे कारबाही सदर करल ओरसे लिखित रूपमे ध्यानाकर्षण कराइल नाउपाके प्रदेश सभा सदस्य घनश्याम चौधरी बटैलैं ।
उहाँ कहलै, ‘संसदीय दलसे कौनो फेन प्रदेश सभा सदस्यहे कारबाही नैकरल कहटी सभामुखके ध्यानाकर्षण कराइल बा ।’
उहे भेटमे संसदीय दलके नेतासे हटाइल बारे फेन छलफल करल बटैलैं । उहाँ सात जाने प्रदेश सभा सदस्य आपनहे दलके नेता चयन करल ओरसे अब्बेसम अपने कायम रहल दावी फेन करलै ।
उहे बिच पत्रकारहुक्रनके प्रतिक्रिया डेटी सभामुख भण्डारी विधि विधानअनुसार प्रदेश सभा सदस्य इन्दिरा गिरीके विषयमे निर्णय हुइल बटैलै ।
