सामुदायिक विद्यालयहे आधारभूत कम्प्यूटर हार्डवेयर तालिम
पहुरा समाचारदाता
हसुलिया, ३० चैत । कैलारी गाउँपालिकाके सामुदायिक विद्यालयके शिक्षकहुकनके लाग १५ दिने आधारभूत कम्प्यूटर हार्डवेयर तालिम सुरु हुइल बा ।
कैलारी गाउँपालिकाके समन्वयमे नवजीवन सेवा संघके आयोजनामे पालिकासे कम्प्यूटर सहयोग हुइल सामुदायिक विद्यालयके शिक्षक प्रतिनिधिहुकनके उ तालिम संचालन हुइल हो । उ तालिम उदघाटन गाउँपालिका उपाध्यक्ष भगवतीकुमारी चौधरीके अध्यक्षतामे हुइल बा ।
कार्यक्रममे उहाँ अब्बे कम्प्युटरके युग रहल ओरसे टेक्निकल बाट जाने पर्ना ओ सिखेपर्ना जरुरी रहल बटैली । बहुट जैसिन ज्ञान चलाईबेर सिखजाइठ मने कबु कबु छोटचिजफे नइजन्लेसे दुःख मिलठ । नयाँ नयाँ प्राविधि ज्ञान सिखे पर्ना जरुरी रहल बटैली ।
प्रमुख प्रशासकीय अधिकृत लक्ष्मीदत्त भट्ट तालिममे सिखल ज्ञानसे अपन विद्यालयमे रहल कम्प्यूटरमे अइना छोट छोट समस्या समाधन करे सेक्ना बटैलै । तालिममे सहजीकरण नविन चौधरी करटी रहल बटै । कार्यक्रमके संचालन नवजीवन सेवा संघके कार्यक्रम संयोजक प्रमिन्द्र श्रेष्ठ करल रहिट ।
