लौवा बरसके उपलक्ष्यमे वनदेवी मन्दिर परिसर सरसफाई

पहुरा समाचारदाता
हसुलिया, १ बैशाख । लौवा बरस २०८१ सालके अवसरमे कैलारी गाउँपालिका वडा नम्बर १ स्थित धार्मिक पर्यटकीय क्षेत्र वनदेवी मन्दिर परिसरमे सरसफाई कार्यक्रम कैगिल बा ।

होटेल बसेरा धनगढी, हिम शिखर क्वल हसुलियाके आयोजना तथा कैलारी गाउँपालिकाके समन्वयमे वनदेवी मन्दिर परिसरमे सरसफाई कार्यक्रम कैगिल हो । कैलारी गाउँपालिका वडा नम्बर १ के वडा अध्यक्ष धोज हरिपाल बोहराके बरका पहुनामे हुइल सरसफाई कार्यक्रममे उहाँ बनदेवी मन्दिर सरसफाई कैना सक्कु जानेक कर्तव्य रहल बटैलै ।

कैलारी गाउँपालिकाके धार्मिक पर्यटन तथा शक्ति पिठके रुपमे रहल यी मन्दिर सफासुग्घर बनाइक लाग सरसफाई कार्यक्रमके आयोजना कैगिल होटेल बसेरा धनगढीके संचालक प्रदीप चौधरी बटैलै । उहाँ कहलै, ‘एक दिन सरसफाई करके टे नइहुई मने सक्कु जाने यहाँ फोहोर करे नइपरठ कना चेतना अइलेसे अवश्यफे सफाई राखे सेक्जाइठ ।

सरसफाई कार्यक्रममे सहयोग होटल जल्सा प्रालि धनगढी, एडुपल नेपाल धनगढी, लेखापढी व्यवसाय धनगढी, एसके डेस्टप एण्ड कन्सलटेन्सी धनगढी, न्यु सुलभ बुक्स एण्ड स्टेशनरी धनगढी, हमार व्याडमिन्टन टिम धनगढी, पुष्प प्रिन्टस धनगढी, बालाजि किराना, डेरी एण्ड बेकरी उद्योग हसुलिया बजार चौराहा रहल बा ।

यी मन्दिरमे दैनिक रुपमे छिमेकी पालिकासेफे दर्शन ओ पूजाके अइनाके साथे पिकनिक खउइयाके अइटी रठै । कलेसे आज बैशाख १ गते उ मन्दिर परिसरमे पिकनिक खउइयाके भीड लागल बा ।