मनोसामाजिक अपाङता सम्बन्धी जनचेतना तथा अन्तरक्रिया कार्यक्रम
पहुरा समाचारदाता
धनगढी, ७ बैशाख । मनोसामाजिक अपाङगता सम्बन्धी जनचेतना तथा अन्तरक्रिया कार्यक्रम शुकके रोजसे धनगढी उपमहानगरपालिका वडा नम्बर १५ तरबरियाके सामुदायिक भवनमे सुरु हुइल बा ।
कोशिस कैलालीके आयोजना तथा धनगढी उपमहानगरपालिका वडा नम्बर १५ के कार्यालयके सहकार्यमे दुई दिने जनचेतनामुलक कार्यक्रमके सुरुवाट हुइल हो । कोशिस कैलालीके अध्यक्ष मनोज चौधरीके अध्यक्षतामे हुइल उदघाटन कार्यक्रममे बरका पहुना वडा नम्बर १५ के वडा सदस्य दलबहादुर रोकाय ओ विशिष्ट पहुना राष्ट्रिय अपाङ महासंघ सुदूरपश्चिम प्रदेश अध्यक्ष मानबहादुर साउद रहल रहिट ।
उदघाटन कार्यक्रममे सम्बोधन वडा–१५ के वडा सदस्य मनोसामाजिक अपाङता गाउँघरमे व्याप्त रहल मने यकरबारेमे आवाज उठे नइसेकल बटैलै । मनोसामाजिक अपाङताबारे जनचेतनामुलक कार्यक्रमके लाग वडा कार्यालयहे सहकार्य कैना मौका डेहलमे उहाँ कोशिस कैलालीहे धन्यवाद व्यक्त करलै ।
राष्ट्रिय अपाङ महासंघ सुदूरपश्चिम प्रदेश अध्यक्ष मानबहादुर साउद मनोसामाजिक अपाङता समस्याहे राज्यसे सम्बोधन करे नइसेकल बटैलै । अपाङता जे जबफे हुई सेकठ,’ उहाँ कहलै, ‘अब्बे सवारी दुर्घटनाके कारण अपाङता हुइना व्यक्तीके संख्या बह्रटा । कोई जन्मजात अपाङता रहठ । कोई पाछेसे अपाङता हुइठै ।’ १० मेरिक अपाङता मन्से मनोसामाजिक अपाङताफे एक हो । मने राज्यसे अभिनसम परिचयपत्र वितरण करे नइसेकल उहाँ बटैलै ।
सुदूरपश्चिम प्रदेशमे ७० हजार अपाङता रहल ओ कैलालीमे केल २२ हजार ४ सय ६५ जाने अपाङता हुइल व्यक्तिके रहल अध्यक्ष साउद बटैलै । मनोसामाजिक अपाङता पहिलेक समस्या हो, मने यकरबारे बुझाई नइसेकल कारण टमान खाले नइमजा व्याख्य करल उहाँ बटैलै ।
नेपाल पत्रकार महासंघ कैलाली शाखाके सचिव प्रेम चौधरी सामाजिक कलहके कारण मनोसामाजिक अपाङताके समस्या बह्रटी गैल बटैलै । हरेक व्यक्तिमे मनोसामाजिक समस्या रहठ,’ उहाँ कहलै, ‘केक्रोमे समस्या ढेर बह्रलपाछे डिप्रेशनमे जैना करठै । कोइ झरकना रना, कोई रिसाहा हुइना रहठै ।’ गाउँघरमे मनोसामाजिक समस्या बह्रलपाछे पहिले पहिले बौराइल, बोक्सीन सिखल मना आरोप लगाजाए । अब्बेफे धार्मिक आस्था रहुइया धामी झाँक्री हेरैना, कोई यी बारे मजा ज्ञान रहलबेला अस्पतालमे डेखैना करल उहाँ बटैलै । मनोसामाजिक अपाङता समयमे उपचार करलेसे ठिक हुइनाफे उहाँ बटैलै ।
कार्यक्रममे भल्मन्साहुकनके ओरसे वडा नम्बर १५ शान्ति कटानके भल्मन्सा शिवकुमार चौधरी गाउँघरमे मनोसामाजिक अपाङता हुइल ढेर व्यक्ति रहल ओ कोशिस कैलालीसे यी मेरिक कार्यक्रम करके ढेर बाट सिख्ना मौका प्रदान करल बटैलै । महिला स्वास्थ्य स्वय सेविका सुजाता चौधरी गाउँघर कौनोफे स्वास्थ्य समस्या आइलबेला अपनेहुक्रे टमान मेरिक परामर्श डेके सहयोग करल बटैली ।
कार्यक्रममे जानकारी डेटी कोशिस कैलालीके मनोसामाजिककर्ता सरिता चौधरी कैलालीके टमान ठाउँमे समुह गठन करके मनोसामाजिक परामर्श सेवा प्रदान करटी आइल बटैली । परामर्श कक्ष संचालन करलपाछे मनोसामाजिक समस्या रहल व्यक्तिमे भारी परिवर्तन आइलफे उहाँ जानकारी करैली ।
दुई दिने जनचेतनामुलक कार्यक्रमके पहिल रोज सहजीकरण नशा तथा मनोरोग विशेषज्ञ डा. रामप्रसाद लामिछाने ओ राष्ट्रिय अपाङ महासंघ सुदूरपश्चिम प्रदेश अध्यक्ष मानबहादुर साउद करले बटै । ओस्टेक शनिच्चरके रोज डाक्टर सुशिल चटौट, कोशिस कैलालीके मनोसामाजिक परामर्शकर्ता पशुपति खातीलगायतसे सहजीकरण कैना कार्यक्रम रहल बा । उदघाटन कार्यक्रमके संचालन करिष्मा चौधरी ओ स्वागत मन्तव्य कोशिस कैलालीके पैरबी समूहके संयोजक शिवराज राना करल रहिट ।
कार्यक्रममे कोशिस कैलालीके प्रतिनिधि, वडा नम्बर १५ के टमान टोलके भल्मन्सा, महिला स्वास्थ्य स्वय सेविका, मनोसामाजिक समस्या रहल व्यक्ति, कोशिस कैलालीसे गठन करल टमान समुहके सदस्यहुकनके सहभागिता रहल बा ।
ओस्टेक यिहे बैशाख ४ गते धनगढी उप–महानगरपालिका वडा नं.१९ के आर्थिक सहयोगमे कोशिश कैलालीके आयोजनामे मनोसमाजिक अपाङता सम्बन्धी जनचेतना तथा अन्तरक्रिया कार्यक्रम हुइल रहे ।
वडा नं.१९ के वडा अध्यक्ष बाँधुराम चौधरीके वरका पहुनामे हुइल कार्यक्रमम विशिष्ट पहुना फुलवारी स्वास्थ्य चौकीके प्रमुख फनेन्द्र कुश्मी, वडा नं १९ के वडा सचिव वलदेव ओझा रहल रहिट । उ जनचेतनामु्लक तालिममे मुख्य प्रशिक्षक राष्ट्रिय अपाङ महासंघ सुदूरपश्चिम प्रदेश अध्यक्ष मानबहादुर साँउद, नशा तथा मनोरोग विशेषज्ञ डा. रामप्रसाद लामिछाने रहल रहिट ।
