अनलाइन मिडिया सञ्चालकसे ध्यानाकर्षण
पहुरा समाचारदाता
धनगढी, १२ बैशाख । सुदूरपश्चिम प्रदेश सरकारके आन्तरिक मामिला तथा कानुन मन्त्रालयसे सुदूरपश्चिम प्रदेशमे सञ्चालनमे रहल अनलाइन मिडियाहे विभेद करले बा ।
मन्त्रालयसेआम सञ्चार क्षेत्रके संस्थागत क्षमता अभिवृद्ध सम्बन्धि प्रकाशित करल सूचनामे अनलाइन सञ्चार माध्यमहे छुटाके विभेद करल कहटी यहाँके अनलाइन सञ्चालक तथा सम्पादकगम्भीर ध्यानाकर्षण हुइल बटैले बटै । उहाँहुक्रे बुधके संयुक्तरुपमे मन्त्रालयहे ध्यानाकर्षण पत्र बुझैटी यथाशक्य निर्णय सच्याइना चेतावनी डेले बाटै ।
मन्त्रालयकेउपसचिव कृष्णप्रसाद नेपालहे ध्यानाकर्षण पत्र बुझैटी संघर्ष समितिके सदस्य विराज रोस्यारा अब्बेक विज्ञान ओ प्रविधिके युगमे सबसे प्रभावकारी माध्यम नै अनलाइन मिडिया हुइल अवस्थामे फेन मन्त्रालयसे अनलाइन मिडियाहे हेर्ना दृष्टि कपट तथा खोटपूर्ण रहल बटैलै । उहाँ कहलै, ‘आम सञ्चार क्षेत्रमे अनलाइन मिडियाहे फेन तुरुन्त समाबेश नैकैलेसे हम्रे कडा आन्दोलनमे उत्रब ।’
ध्यानाकर्षण पत्र बुझ्टी उपसचिव नेपाल मन्त्रालयके सचिव काम विशेषसे बाहर गैल ओरसे उहाँ अइटी किल बात रख्ना बटैलै । उहाँ कहलै, ‘इ विषयमे का रहल बा, उ मै बुझके छलफलमे लानके माग पूरा कैना प्रयास करम ।’
आन्तरिक मामिला तथा कानुन मन्त्रालयसे गत चैत २३ गते आम सञ्चार क्षेत्रके संस्थागत क्षमता अभिवृद्धि सम्बन्धि सार्वजनिक सूचना जारी करल रहे । सूचनामे अनलाइन मिडिया बाहेक रेडियो, टेलिभिजन ओ पत्रपत्रिकाहे किल आवेदन डेना आह्वान करल रहे ।
