११ सय ३५ मुक्त हलिया पुनस्र्थापनासे बञ्चित

पुनस्र्थापनाके कामहे आघे बह्रैना साझा अभियान बनैना सुझाव

पहुरा समाचारदाता
धनगढी, ३१ बैशाख । नेपाल सरकारसे हलिया मुक्ती घोषणा कैलक १६ बरस विटलेसेफे अभिनफे ११ सय ३५ जाने मुक्त हलिया पुनस्र्थापनासे बञ्चित रहल बटै ।

सोम्मारके रोज धनगढीमे राष्ट्रिय मुक्त हलिया समाज महासंघ नेपालके आयोजनामे एक दिने प्रदेश स्तरीय अर्धवार्षिक संजालीकरण गोष्ठीमे महासंघके कार्यकारी निर्देशक हरिसिंह बोहरा ओटरा मुक्त हलिया पुनस्र्थापनासे बञ्चित रहल जनैले रहिट । एलडब्लुएफ÷इएलसिएके आर्थिक सहयोगमे मानवअधिकारकर्मी, सामाजिक अभियन्ता तथा नागरिक समाज संगठनहुकनके सहकार्यमे मुक्तहलियाके न्यायोचित पूनस्र्थापनाके लाग याोजना तथा रणनीति तर्जुमा ओ सिकाई अदानप्रदान कार्यक्रममे संस्थाके कैगिल काम ओ हाल समके अवस्थाबारे प्रस्तुतीकरण करण उहाँ नेपाल सरकार ओ हलिया महासंघ विच हुइल पाँच बुँदे सहमति कार्यान्वयन नइहुइल बटैलै । मुक्त हलिया सुदूरपश्चिम प्रदेशके नौ जिल्ला ओ कर्णाली प्रदेशके तीन जिल्ला सुर्खेत, जारकोट ओ हुम्ला करके १६ हजार ९ सय ५३ जाने मुक्त हलिया रहल उहाँ जनैलै ।

नेपाल सरकारसे जम्मा लेहल तथ्यांक संख्या १९ हजार ५९, दोहरो टेहरो नाउँ हटाके पुनप्रमाणीकरण हुइल संख्या १६ हजार ९ सय ५३, परिचयपत्र प्राप्त करल संख्या १४ हजार २४२ ओ हालसम पूनस्र्थापना हुइल संख्या १३ हजार ५४६ रहल उहाँ जनैलै ।
ओम्नेसे जग्गा खरिद ओ घर निर्माण दुनु रहल २ हजार ३४२, घर निर्माण केल ११ सय ९६, जग्गा केल खरिद ८०३ ओ घर मर्मत ९ हजार २०५ जाने रहल उहाँ जनैलै ।

पूनस्र्थापना बाँकी संख्या हेरेबेर कैलालीमे ४६, बैतडी ३२, डडेल्धुरा ४८९, सुर्खेत ८०, बझाङ २१७, डोटी ६७, बाजुरा ९८ ओ कञ्चनपुरमे १०६ जाने रहल कार्यकारी निर्देशक बोहरा बटैलै ।

कार्यक्रममे सहजीकरण करटी संविधानसभा सभा सदस्य तथा मुक्त हलिया अभियन्ता हरि श्रीपाइली मुक्ती घोषणा हुइल १६ बरष विटल ओ अब्बे पुनस्र्थापनाके सक्कु काम रुकल ओ प्रदेश सरकार पुर्नस्थापनामे उदासिनता डेखल ओरसे दबाबके लाग साझा अभियान बनाके जैना बटैलै । अब्बे दवाव डेहे सेक्लेसे पुनस्र्थापनाके काम आघे बह्राइक लाग बजेट विनियोजित करुवाई सेक्ना उहाँ बटैलै ।

कार्यक्रमके दुसर सहजकर्ता अग्रज पत्रकार मनमोहन स्वाँर अभिन का प्रगती हुइल उहीहे संस्थागत करटी रुकल कामहे आघे बह्राइक लाग दबाव डेहे पर्ना बटैलै । पुनस्र्थापनाके काम बाँकी रहल कहटी आन्दोलनहे सुस्त बनैलेसे सरकारसे ओकर सुनुवाई नइकैना बटैलै ।

इन्सेक प्रदेश संयोजक खडकराज जोशी पुनस्र्थापनाके कामहे आघे बह्राइक लाग साझा मुद्दा बनाके दवाव डेहे सेक्लेसे केल यकर सुनुवाई हुइना बटैलै । अभिनफे छुट हलिया हुई सेक्ना ओरसे अब्बेक अवस्था का बा कना तथ्याङक संकलन जरुरी रहल बटैलै ।
अधिवक्ता बालाराम भट्टराई पुनस्र्थापनाके कामहे आघे बह्रैना दवाबके लाग कार्यदल बनाके आघे बह्रना सुझाव डेलै । उहाँ अभिनसमके उपलब्धीहे संस्थागत कैटी अइना रणनीति बनाके आघे बह्रना जरुरी रहल बटैलै ।

मुक्तकमैया समाजके केन्द्रीय अध्यक्ष पशुपति चौधरी पुनस्र्थापनाके काम कहाँसे रुकल बा । रोकल ठाउँसे आघे बह्रैना जरुरी रहल बटैलै । कार्यक्रममे राष्ट्रिय मानव अधिकार आयोगके अधिकृत गणेश जोशी, याक नेपालके देवी खनाल, नेपाल राष्ट्रिय दलित समाज कल्याण संघके अध्यक्ष चक्र विक, फेदो कैलालीके अध्यक्ष सविना सुनार, राष्ट्रिय मुक्त हलिया समाज महासंघ नेपालके राजुराम भुल, गोरख सार्कीलगायत अपन बाट राखल रहिट ।

राष्ट्रिय मुक्त हलिया समाज महासंघ नेपालके केन्द्रीय अध्यक्ष ईश्वर सुनारके अध्यक्षतामे हुइल कार्यक्रममे उहाँ महासंघ मुक्त हलियाके न्यायोचित पुनस्र्थापनाके लाग लागल बटैलै । आन्दोलन जारी रहल ओरसे सक्कु साथ सहयोग अपरीहार्य रहल बटैलै । कार्यक्रममे स्वागत मन्तव्य महासचिव मंगलबहादुर सार्की करले रहिट ।