घोडाघोडीमे चिँरै उत्सव ओ फोटो प्रदर्शनी

पहुरा समाचारदाता
सुखड, ९ जेठ । जैविक विविधतासे महत्वपूर्ण विश्व रामसार क्षेत्र कैलालीके घोडाघोडी टल्वामे चिँरै उत्सव तथा फोटा प्रदर्शनी कार्यक्रम सुरु हुइल बा ।

अन्तर्राष्ट्रिय जैविक विविधता दिवसके अवसरमे बुधके एक औपचारिक कार्यक्रमबिच फोटो प्रदर्शनी सुरु करल हो । डिभिजन वन कार्यालय पहलमानपुरके आयोजना तथा नेपाल पंक्षी संरक्षण सङ्घके व्यवस्थापनमे सुरु हुइल चिँरै उत्सव तथा फोटा प्रदर्शनी जेठ १३ गतेसम जारी रहना जनाइल बा ।

नेपालके पहिल चरा अभय आरण्य क्षेत्र घोडाघोडीमे पहिलचो हुइल फोटो प्रदर्शनी कार्यक्रममे नगरप्रमुख खडकबहादुर रावत फोटोमे रहल चिँरैनहे संरक्षण कैना सरोकारवाला सक्कु जाने जुटे पर्ना बटैलै ।

उहाँ जैविक विविधता अन्तर्गत घोडाघोडीमे रहल टमान आगन्तुक तथा रैथाने चिँरै संरक्षणके लाग फोटो प्रदर्शनी कार्यक्रम सचेतनाके काम कैनामे विश्वास व्यक्त करलै ।

संरक्षणके लाग योगदान करुइया व्यक्तिहे धन्यबाद डेटी नगरप्रमुख रावत कहलै, “अतिक्रमण ओ मानवीय गतिविधिके कारण संकटमे परल जैविक विविधताहे बचैना हमार सबके दायित्व हो ।” घोडाघोडीमे ३८० प्रजातिके चिँरै पैना रेकर्डमे उल्लेख रहल बा ।

२०७८ फागुनमे सुदूरपश्चिममे प्रदेश सरकारसे नेपालके पहिल चरा अभय आरण्य (बर्ड सेन्चुरी) क्षेत्र घोषणा करलपाछे घोडाघोडीके संरक्षणमे चासो डेहे लागल बा ।

डिभिजन वन कार्यालय पहलमानपुरके प्रमुख रामविचारी ठाकुर घोडाघोडीमे चिँरैनके फोटो प्रदर्शनसे बृहतरुपमे संरक्षणके लाग सचेतना फैलैनाके साथे चिँरै पर्यटन विकासमे सहयोग पुग्ना बटैलै ।

उहाँ घोडाघोडी घुमे अउइया पर्यटक घोडाघोडीमे ढेउर चिँरै पाजैठै कना सुन्लेसे फेन प्रत्यक्ष अवलोकनसे सक्कु चिँरै डेखे नैपाइल अवस्थामे फोटो अवलोकनसे लाभ लेहे सेक्ना बटैलै । लम्मा समयसे घोडाघोडी क्षेत्रके चिँरै गणना कार्यमा सक्रिय नेपाल पंक्षी संरक्षण सङ्घके फिल्ड अधिकृत तथा चराविद् हिरुलाल डंगौरा प्रदर्शनीमे राखल चिँरैनके बारेम जानकारी कराइल रहिट ।

उहाँ घोडाघोडीमे पैना महत्वपूर्ण चिँरैमध्ये ६५ ठो फोटो प्रदर्शनीमे समावेस करल जनैटी उ चिँरै गणना हुइल ओ बरस ओ विशेषता बारेम जानकारी डेलै । चिँरै उत्सव तथा फोटो प्रदर्शनी कार्यक्रममे प्रदेश पर्यटन विकास कार्यक्रम कार्यान्वयन एकाइ प्रमुख डबल बोहरा घोडाघोडीको जैविक विविधता संरक्षणसँगे पर्यटन प्रबर्धनमे चिँरै उत्सव तथा फोटा प्रदर्शनीसे सहयोग पुग्ना बटैलै ।

कार्यक्रममे डल्फिन संरक्षण केन्द्रके विजयराज श्रेष्ठ, चरा संरक्षण नेटवर्कके अध्यक्ष दयाराम चौधरी, सामुदायिक वन उपभोक्ता महासङ्घके मैना ढकाल, वसन्ता संरक्षण वन समितिके अध्यक्ष पुष्कल बम लगायत सिमसार, जैविक विविधता ओ पर्यटनके विषयमे धारणा राखल रहिट ।